Оқу-ағарту министрлігі Балалардың құқықтарын қорғау комитеті Астанада тұрғын үй кешендерінің бірінде балаларды ұрған жағдайға қатысты ресми мәлімдеме жасады, деп хабарлайды BAQ.KZ тілшісі.
Астана қаласы Білім басқармасының мәліметінше, оқиға 2024 жылдың 4 ақпанында сағат 14:57-де болған. Белгісіз ер адам пәтерден шығып, балаларға зиянын тигізе бастаған. Жағдайды білген кәмелетке толмаған балалардың бірінің әкесі дереу жедел жәрдем шақырған.
Кәмелетке толмаған балаларымен бірге ата-аналар қалалық балалар ауруханасына жеткізіліп, сағат 19:40-та үйлеріне жіберілді.
Қазіргі уақытта қылмыстық іс қозғалды.
Қоғамды алаңдататын мұндай оқиғаларға мүлдем жол берілмейді. Балаларға қатысты зорлық-зомбылық немесе қорқыту олардың қауіпсіздікке, физикалық және эмоционалдық әл-ауқатына деген құқықтарын бұзады. Қоғам, мемлекеттік және құқық қорғау органдары мұндай оқиғалардың алдын алу және кінәлілердің жазалануын қамтамасыз ету үшін шаралар қабылдауға міндетті, - деді комитеттің баспасөз қызметі.
Бұған дейін Астанадағы тұрғын үйлердің бірінің кіреберісінде балаларға қол көтерді деген күдікпен ер адам ұсталғанын хабарлаған болатынбыз.
