Қазіргі уақытта Астанада олимпиадалық емес, ұлттық және техникалық спорт түрлері бойынша құрама командалар құрылып, оларға қолдау көрсетіліп жатыр. Олардың барлығына мемлекет тарапынан барынша қолдау көрсетіледі, деп хабарлайды BAQ.KZ қалалық әкімдіктің ресми сайтына сілтеме жасап.
Бұл туралы елорданың коммуникациялар қызметінде өткен брифингте спортты дамыту дирекциясының олимпиадалық емес түрлері бойынша қызметі мен спортты насихаттау туралы мекеме басшысы Дастан Алдашов мәлімдейді.
Дирекция Астанада 2020 жылдың қараша айында спорт түрлері бойынша қала командаларын сапалы және тиімді даярлау, сондай-ақ халықаралық және республикалық спорттық іс-шараларда жоғары нәтижелерге қол жеткізу үшін жұмысын бастады.
Дирекция қызметінің міндеттері:
- спортшылардың спорттық шеберлігін арттыру және спорт аренасында табысты өнер көрсету мақсатында спорт түрлері бойынша Астана қаласының командаларын іріктеу, қалыптастыру, даярлау және қамтамасыз ету;
- Астана қаласының жоғары дәрежелі спортшылары мен спорт резервін спорт түрлері бойынша Қазақстан Республикасы Ұлттық құрама командаларының негізгі құрамына дайындау;
- Астана қаласында олимпиадалық емес, ұлттық, техникалық және ойын спорт түрлерін дамыту.
Биыл дирекцияда спорттың 58 түріне дайындық жүргізіледі, спорт түрлері бойынша елорда командаларының құрамы 2 378 спортшыны құрайды, оның ішінде ҚР Еңбек сіңірген спорт шеберлері – 4, ҚР халықаралық дәрежедегі спорт шеберлері – 112, ҚР спорт шеберлері – 194, ҚР спорт шеберіне кандидаттар – 393, ҚР түрлері бойынша ұлттық құрамалар құрамына спортқа 565 спортшы кіреді.Ай сайынғы ақшалай қаражатты алатын спорт түрлері бойынша қаланың штаттық командасына 65 спортшы кіреді, - деді спикер.
Қазіргі уақытта спорт түрлері бойынша қала құрамаларымен 60 аға жаттықтырушы жұмыс жүргізуде, оның ішінде 12 Қазақстан Республикасының Еңбек сіңірген жаттықтырушысы, 36 біліктілігі жоғары деңгейдегі жоғары санатты жаттықтырушы, 2 біліктілігі жоғары деңгейдегі бірінші санатты жаттықтырушы, 2 біліктілігі жоғары деңгейдегі екінші санатты жаттықтырушы, 14 санатсыз жаттықтырушы бар.
2023 жылы қаңтар-маусым аралығында Астана құрамасының спортшылары спорт түрлері бойынша 141 республикалық және халықаралық жарыстарға қатысты, республикалық жарыстарда жеңіп алған медальдардың жалпы саны – 955, оның ішінде алтын медаль – 380, күміс медаль – 295, қола медаль – 279.
Халықаралық жарыстардағы медальдардың жалпы саны – 236, оның ішінде алтын – 89, күміс – 68, қола – 78.
