Астанада биыл Тәуелсіздік даңғылында Есіл өзені арқылы өтетін автомобиль көпірі ашылады, деп хабарлайды BAQ.KZ.
Бұл туралы елорда әкімі Жеңіс Қасымбек әлеуметтік желідегі парақшасында жазды.
Биыл Тәуелсіздік даңғылында Есіл өзені арқылы өтетін автомобиль көпірін ашамыз. Аталмыш көпірдің құрылыс барысымен таныстым, ол көлік қозғалысын едәуір жылдамтады: Тәуелсіздік даңғылы, жаңа теміржол вокзалы аумағы, Қошқарбаев даңғылы, Нәжімеденов көшесі, Әзірет Сұлтан мешіті, Байтұрсынов, Қордай, Айнакөл көшелері, Момышұлы даңғылы және сол жағалау арасында қосымша байланысты қамтамасыз етеді. Көпір құрылысының қарқынын арттыруды міндеттедім, - деді ол.
Қасымбек қаладағы көлік нөпірін жеңілдету үшін жаңа көшелер салынып, жаңа жолдар ашылатынын айтты.
Көлік нөпірін жеңілдету үшін жаңа көшелер салуды, жаңа жолдар ашуды, жаңа көпірлер жобалауды және т.б. жалғастырамыз. Аудандар мен коммуналдық қызметтерге қар күреу жұмысын күшейтуді тапсырдым. Ауа райының құбылмалылығын, оның ішінде температураның төмендеуін ескерер болсақ, қозғалысы қарқынды учаскелердің, әлеуметтік нысандарға кірер жолдардың, тротуарлардың, аялдамалардың және т.б. қарын күреуге ерекше назар аудару қажет, - деді ол.
