«Астана Опера» үрмелі аспаптар квартеті халықаралық байқауда жеңіске жетті

23 Наурыз 2021, 10:51
1709
Бөлісу:
«Астана Опера» үрмелі аспаптар квартеті халықаралық байқауда жеңіске жетті

Нұр-Сұлтан, BAQ.KZ. «Астана Опера» симфониялық оркестрінің музыканттары, танымал Astrobones квартетінің мүшелері Фархад Болатов, Алмас Сағымбаев, Альбина Өтегенова және Ерасыл Әмешов GRAND MUSIC ART бейнежазбалары бойынша музыканттар арасындағы X Үлкен халықаралық байқауда бірінші жүлдеге ие болды.

Байқауға қатысушыларды бағалау үшін Ресейдің және басқа да шет елдердің жетекші музыканттары шақырылған болатын. Үрмелі және соқпалы аспаптар номинациясы бойынша әртістердің талантын Мәскеу консерваториясының доценті, Ресей Мемлекеттік академиялық Үлкен театры оркестрінің солисі Алексей Корнильев, Ресей Мемлекеттік академиялық Үлкен театры оркестрінің кларнеттер тобының концертмейстер-солисі Сергей Петров және Мәскеу консерваториясының профессоры, Шнитке атындағы МММИ профессоры, Ресей Мемлекеттік академиялық Үлкен театры оркестрінің солисі Эркин Юсупов бағалады.

Мәскеу байқауында 200 қаладан 2760 музыкант қатысқанын атап өту маңызды.

Бізге бұл премияны алу жағымды әсер қалдырды және күтпеген оқиға болды. Бұл жолы біз жаңа құраммен өнер көрсеттік, әрине, қобалжыдық, бірақ барлығымыз талапты орындап біздің еліміздің музыкалық өнерін халықаралық байқауда лайықты таныстыра білдік. Әсіресе бұл жеңіске жарқын Наурыз мейрамы қарсаңында қол жеткізу маңызды болды. Байқаулар музыканттар үшін өте маңызды, олар жаңа оң әсерлер алуға, музыкамен көбірек айналысуға, жаңа қиын шығармаларды дайындауға жетелейді. Бұл жеңіс бізге үлкен шабыт берді, енді көп концерттер беруді, түрлі қызықты бағдарламалар дайындауды жоспарлап отырмыз. Сондай-ақ жоспарымызда Ресейде концерт беруді ойлап жүрміз, біздерді әлдеқашан фестивальге де шақырды, егер эпидемиологиялық ахуал мүмкіндік берсе, онда біз Қазақстанның өнерін Өзбекстанда да ұсынатын боламыз, - деп атап өтті квартеттің жетекшісі Фархад Болатов.

Одан бөлек, байқау аясында өзекті тақырыптарға онлайн-дәрістер мен шеберлік сыныптары өтті. Ұйымдастырушылар кері байланыс мүмкіндіктерін пысықтап, көрсетілім кезінде тыңдармандар дәріскерлерге сұрақтар қойды.

GRAND MUSIC ART байқауы бейнежазбалар бойынша өтті. Халықаралық байқауға қашықтан қатысу орындаушыларға заманауи жағдайда жаңа мүмкіндіктер ашты.


Өзгелердің жаңалығы