Алакөлдің туристік инфрақұрылымына шамамен 30 млрд теңге бөлінеді: 2026 жылы курорт қалай дамиды?

Абай облысындағы жағалауда алдын ала құны шамамен 10 млрд теңгені құрайтын 20-ға жуық инфрақұрылымдық жобаны іске асыру жоспарланған. Оларды республикалық және жергілікті бюджет есебінен, сондай-ақ жеке инвестициялар арқылы қаржыландыру көзделіп отыр.

Басқармада жобалардың нақты құны әзірге белгіленбегенін нақтылады.

Қазіргі уақытта жобалардың бір бөлігі жобалық-сметалық құжаттаманы әзірлеу, мемлекеттік сараптамадан өткізу, сондай-ақ жобалық шешімдерді дайындау және келісу кезеңінде болғандықтан, олардың жалпы құны туралы нақты ақпарат беру әзірге мүмкін емес. Барлық қажетті рәсімдер аяқталып, жобалық-сметалық құжаттама бекітілгеннен кейін жобалардың түпкілікті құны айқындалады, – делінген ресми жауапта.

Осылайша, екі өңірдегі туристік инфрақұрылымды дамытуға 2026 жылы бөлінетін қаржының алдын ала көлемі шамамен 30 млрд теңгені құрайды. Оның 20 млрд теңгесі жалпы Жетісу облысындағы туризм саласын дамытуға бөлінсе, шамамен 10 млрд теңге Абай облысындағы Алакөл жағалауында жүзеге асырылатын жобаларға қарастырылған.

Жағажай аумағы он есе ұлғаяды

Абай облысында 2026–2028 жылдарға арналған Алакөл демалыс аймағын дамыту жөніндегі жол картасы әзірленді. Құжат төрт бөлімнен тұрады және 43 іс-шараны қамтиды.

Ірі жобалардың бірі жағажай және туристік аймақтың аумағын 300 гектардан 3 000 гектарға дейін ұлғайтуды көздейді. Осылайша, курорттың аумағы он есе кеңеймек.

Жағажай аумағының ұлғаюы курорттың рекреациялық мүмкіндіктерін едәуір кеңейтіп, туристік инфрақұрылымды одан әрі дамытуға қолайлы жағдай жасайды, – деп түсіндірді Абай облысының туризм басқармасы.

Ресми жауапта барлық 3 000 гектар аумақты толық игеру мерзімі нақты көрсетілмеген.

Жаңа электр беру желілері салынады

Абай облысындағы жағалауда ұзындығы 72 шақырым болатын «Көктал – Алакөл» магистральдық электр беру желісі салынып жатыр. Қазіргі уақытта нысанда құрылыс-монтаж жұмыстары жалғасуда.

2026 жылы мұнда электр беру желілерінің 400 жаңа тірегі орнатылды, бұған дейін қойылған 300 тіректегі жарық шамдары ауыстырылып, 18 шақырым электр кабелі жаңартылды.

Ал Жетісу облысындағы Алакөл жағалауында ірі энергетикалық жоба 2025 жылы аяқталды. Ұзындығы 56,7 шақырым болатын, кернеуі 110 кВ электр беру желісі жаңа «Ақши» қосалқы станциясына дейін тартылды. Сонымен қатар «Бескөл-182» қосалқы станциясы жаңғыртылды.

Басқарманың мәліметінше, бұл жұмыстар электр энергиясы тапшылығын жоюға, Ақши ауылы мен оған жақын елді мекендерді үздіксіз электрмен қамтамасыз етуге, сондай-ақ курорттық аймақты одан әрі дамыту үшін қосымша қуат резервін қалыптастыруға мүмкіндік берген.

Ақшиде ірі тазарту құрылысы салынып жатыр

Жетісу облысындағы Алакөл жағалауында Ақши ауылындағы кәріздік тазарту құрылысының құрылысы жалғасып жатыр. Қазір жобаның екінші кезеңі іске асырылуда. Нысан пайдалануға берілгеннен кейін тәулігіне 6,5 мың текше метр ағынды суды тазартуға қауқарлы болады. Тазартылған суды техникалық мақсатта қайта пайдалану жоспарланып отыр.

Бұл – жобалық қуаты жағынан еліміздегі ең ірі нысандардың бірі. Мұндай ауқымды жоба курорттық аймақтардың алдағы уақытта кеңею мүмкіндігі ескеріліп салынып жатыр. Нысанды жыл соңына дейін пайдалануға беру жоспарланған, – деп мәлімдеді басқарма.

Кәріз жүйесінің құрылысы 2022 жылы басталған. Жобаның бірінші кезеңі аясында елді мекен ішіндегі 69,7 шақырым кәріз желісі тартылды.

Жағалау шайылудан қорғалады

Жетісу облысындағы Алакөл жағалауында жағалауды бекіту бөгетінің құрылысы жалғасуда. Жоба жалпы ұзындығы шамамен 14 шақырым болатын жағалау аумағын қамтиды. Оның 10,43 шақырымы Ақши ауылы жағынан, ал 3,56 шақырымы Көктұма ауылы жағынан өтеді.

Қазіргі таңда 2,2 шақырымнан астам бөлігі салынды. Құрылыс жұмыстарын толық аяқтау 2027 жылдың соңына жоспарланған.

Жоба жағалауды шайылудан қорғаумен қатар, баспалдақтар, пандустар, көтергіш құрылғылар және модульдік санитарлық тораптар орнатуды да көздейді. Бұл нысандар жағалауды жүріп-тұруы шектеулі азаматтар үшін қолжетімді етуге мүмкіндік береді.

Абай облысында ұзындығы 3 018 метр болатын жағалау бөлігін бекітуге арналған жобалық-сметалық құжаттама әзірленді. Бекітілетін аумақтың ені 26 метр, биіктігі 6 метр болады деп жоспарланған. Жоба темірбетонмен күшейту жұмыстарын қарастырады.

Интернет жылдамдығы – 500 Мбит/с, жасанды интеллекті бар бейнекамералар орнатылды

Абай облысындағы жағалауда үш антенна-діңгекті байланыс нысаны мен талшықты-оптикалық байланыс желісінің құрылысы аяқталды.

2025 жылы желіге Activ операторы қосылса, 2026 жылы Tele2 мен Beeline операторлары қосылды. Қазір талшықты-оптикалық байланыс желісіне 150-ден астам демалыс орны қосылған. Интернет жылдамдығы 500 Мбит/с-қа дейін жетеді.

Қоғамдық қауіпсіздікті қамтамасыз ету үшін жағалауда жасанды интеллект технологиясымен жабдықталған 224 бейнебақылау камерасы пайдалануға берілді.

Жетісу облысындағы Ақши мен Көктұма ауылдарында ұялы байланыс операторларының 19 базалық станциясы жұмыс істеп тұр. Жағалауға талшықты-оптикалық байланыс желісі де жеткізілген. Демалыс аймақтары мен туристік нысандар өтінімдердің түсуіне қарай кезең-кезеңімен осы желіге қосылып жатыр.

Курортқа апаратын жолдар мен көлік қатынасы жаңартылады

Абай облысында ұзындығы 8,2 шақырым болатын Қабанбай ауылының айналма жолын қайта жаңартуға арналған жобалық-сметалық құжаттама әзірленді. Қазір жоба мемлекеттік сараптамадан өтіп жатыр.

Жаңа жол елді мекен арқылы өтетін транзиттік көлік ағынын азайтуы тиіс. Сонымен қатар ұзындығы бес шақырым болатын автомобиль жолына жаңа асфальт төселіп, орташа жөндеу жұмыстары аяқталды.