Алматы, BAQ.KZ. Алматы қаласы Полиция департаменті метро бекетінің жанынан оқ-дәрі табылғанын хабарлады.
Оны полицияның Дозор есімді ізкесуші иті тапқан.
Түске таман инспектор-кинолог «Абай» бекетіне іргелес аумақты аралап шықты. Бір кезде жарылғыш заттарды іздеуге машықтанған қызметтік ит иісті сезіп, серіктесін шыршалары бар алаңға жетеледі. Оның бірінің астынан 5,45 калибрлі Калашников автоматының 30 дана патроны және екі бірлік жарықшулы граната табылды. Оқ-дәріні Медеу аудандық Полиция басқармасының жедел-тергеу тобы процессуалдық тәртіпте тәркіледі. Олардың нақты тиесілігі тергеу барысында анықталады, – деді Метрополитендегі Полиция басқармасының бастығы Ерік Насырбеков.
