Алматыда үш адамның өмірін қиған автобус апатына қатысты қылмыстық іс бойынша сот отырысын тікелей эфирден көруге болады, деп хабарлайды Алматыдағы BAQ.KZ тілшісі.
Сотталушы Дархан Ахметжанов жүргізуші автобусты тоқтатып, жол-көлік оқиғасын болдырмауына мүмкіндігі болғанын атап өтті.
Бұл қылмысты жасау себебі - жүргізуші Шөкебаева мені көпшіліктің алдында қорлап, ар-намысыма тиетін сөздер айтып, қоғамдық көліктің есігін ашпай, мені екі аялдамада түсірмеуі болды. Ал 351-баптың 3-бөлігі бойынша кінәмді мойындамаймын. Жүргізуші Шөкебаева менің соққымнан талып қалған жоқ. Сол себептен оның басқаруындағы автобусты тоқтатып, жол-көлік оқиғасын болдырмай, адамдарды басып кетпеуіне мүмкіндігі болды, – дейді Ахметжанов.
Сотталушы сотта өзінің бұзақылық бабы бойынша кінәсін мойындайтынын және кәмелетке толмаған 3 баласының бар екенңн ескеруді өтінді. Сондай-ақ ҚК 293-бабының 1-бөлігінде көрсетілген қылмыс жасауына байланысты бас бостандығынан айырмайтын жаза тағайындауды сұрады.
Құрметті сот, менің кәмелетке толмаған үш баламның барын және қылмыстық жауапкершілікке бұрын тартылмағанымды ескеріп маған ҚК 293-бабының, 1-бөлігінде көрсетілген қылмыс жасауыма байланысты бас бостандығымнан айырмайтын жаза тағайындауды сұраймын. Ал ҚК 351-бабының 3-бөлігінде көрсетіліп, маған тағылған айып бойынша мені кінәсіз деп танып, ақтауыңызды сұраймын. Барлық жәбірленушіден адами тұрғыдан, шынайы кешірім сұраймын, – дейді сотталушы Дархан Ахметжанов.
Еске салсақ, бүгін сотталушының анасы да сотта сөз сөйлеп, автобус апатынын зардап шеккен жәбірленуші материалдық шығынды автопарк көтеруі қажет екенін айтқан болатын.
