Алматы, BAQ.KZ. Алматыда жыл басынан бері мас күйінде көлік жүргізгені үшін 700-ден астам жүргізуші әкімшілік қамауға алынды. Бұл туралы Алматы ПД-нің баспасөз қызметі хабарлады.
Алматы қаласының ТЖК-нің шешіміне сәйкес жыл басынан бері алкогольдік немесе есірткілік мас күйде көлік құралын жүргізген 711 жүргізуші әкімшілік қамауға алынды. Жалпы, жеті айда патрульдермен қала жолдарында мас күйінде көлік жүргізген 713 жүргізуші ұсталған. Сот 1 мың 084 автокөлік жүргізушісін көлік құралын басқару құқығынан айырыпты.
Жалпы, қалада жол жағдайы тұрақты. Апат деңгейі 41,3%-ға азайды. Зардап шеккендермен 1 мың 486 жол-көлік оқиғасы тіркелді, онда 46 адам қайтыс болды, тағы 1 мың 718 адам жарақат алған. Жыл басынан бері 546 мың 925 жол қозғалысы ережесін бұзушылық анықталды. Бүгінгі таңда жол қозғалысы ережелерінің бұзылуын болдырмайтын және алдын алатын факторлардың бірі – 105 постты қамтитын “Жол қозғалысы қауіпсіздігі” автоматтандырылған ақпараттық жүйесі, сонымен қатар, “Сергек” жүйесі. Олардың көмегімен 354 мың 083 бұзушылық тіркелді, – дейді Алматы қалалық ПД Әкімшілік полиция басқармасының бастығы Жандос Мұраталиев.
Сонымен қатар, ол Алматы автопаркінің саны 538 мың 138 бірлікті құрайтынын айтты. Қаладағы автокөлік жолдарының ұзындығы - 3 мың 096 км.
Қала әкімдігімен бірлесіп, қоршаған ортаның ластануын азайту және Алматыға техникалық ақаулы көліктердің кіруін шектеу бойынша шаралар қабылдануда. Қаланың негізгі кіре берістерінде орнатылған 10 экологиялық постта пайдаланылған газдар шығарындыларының нормативтерін бақылау жұмыстары үнемі жүргізіліп отырады. Жыл басынан бері экологиялық стандарттардың 4 мың 087 бұзылуы анықталды, 2 мың 463 немесе 65,9% резидент емес көліктер бұзды. Бұл жүргізушілерге қатысты әкімшілік шаралар қолданылды, – дейді Мұраталиев.
