Нұр-Сұлтан, BAQ.KZ. "Қазақстанның 100 жаңа есімі" жобасына қатысқандардың барлығы да әр саланың үздіктері, "Еңбектің наны тәтті" деген ұстаныммен жүрген ел азаматтары. Солардың бірі – Рүстем Ермекбай, деп жазды ruh.kz порталы.
Рүстем Ермекбай Өзбекстан елінен 18 жасында атамекені – Қазақстанға қоныс аударды. Қазақстандық бренд sabyrzhanayrin-нің негізін қалап, бүгінде ЖСШ Ayrin Group текстильді холдингін және халықтық жоба Ayrin Online-нің бас директоры болып қызмет атқарады.
Рүстемнің айтуынша, аталмыш жобаның астарында терең философия бар.
Меніңше, жобада терең философия бар. Елімізде танымал адамдар көп. Жобаның мақсаты: басқа салаларда жетістікке жетіп, халық жақсы біле бермейтін адамдарды «100 жаңа есімге» енгізу арқылы өзгелерге үлгі ету. Бұның өзі адамға күш береді, - деп атап өтті ол.
Оның ойынша, "100 жаңа есім" жобасында жеңіске жеткендердің бәрі өте жақсы жұмыс істеп, еліміздің игілі үшін қызмет істеп жүрген адамдар.
Қарап отырсаңыздар жеңіске жеткендердің барлығы өте жақсы жұмыс істеп, еліміздің игілі үшін қызмет істеп жүрген адамдар. Ондай адамдар елімізде көп. Осындай жобаны ұйымдастырғандарының өзі үлкен шабыт сыйлап, мүмкіндік береді. Әрине, қатысушылар басында "100 жаңа есімге" енейік, көрінейік деп еңбек етпейді. Өзін дәлелдеп, шын мәнінде еңбек еткен ең мықтылары ғана елдің алдына шығады. "100 жаңа есім" – жастардың елге танылуына үлкен мүмкіндік, еңбегін бағалаудың бір жолы. Сол үшін де мен қатты қуанамын. Жобамен әуелден таныспын. Өткен жылдары қатысқандарға қарап, қызығып жүрдім. Сөйтіп, өзімді ұсындым. Алайда дауыс беру кезеңінде мен өтпеген екенмін. Қазылар алқасы мүшелерінің ұсынуымен жеңіске жеттім, - деді ол.
Рүстем дауыс беру кезеңінде төмен ұпай жинағанда көңілі түспегенін айтты.
Менде мынадай ереже бар: бір зат менікі болатын болса, ол менен қашпайды. Кәсіпте де, басқа да да үлкен мақсаттар қоямын. Мәселен, 5 жыл бұрын 18 метр квадрат пәтерде тұрдым, қолымда қаражатым, бойымда тәжірибем жоқ. Кәсібімді ең алғаш бастаған кездер еді. Осы 5 жылдықта елеулі жетістіктерге қол жеткіздім. Соған жетуімнің басты себебі мақсат қойған кезде қолымнан келгенінше еңбек еткенім деп білемін. Ары қарай нәтижесі маған байланысты емес. Менің міндетім тек әрекет етеді. Сондықтан дауыс саны аз болған уақытта көңілім түспеді. 25 000, 35 000 дауыс жинағандарды көріп таңқалатынмын. Мен 4500 дауыс жинадым, - деп түсіндірді кәсіпкер.
Ол "Жастар жылы" несімен есте қалғанын айтты.
Қатты қуантатыны – "Z ұрпағы". Өкінішке орай, біз оған жатпаймыз. Дегенмен қиғаштап келудеміз. Салыстырмалы түрде қарасаңыз, ХХ ғасыр физикалық тұрғыдан еңбектің ғасыры болған. ХХІ ғасырдың жастары жасампаз, шығармашыл. Заман мен күткеннен де тез дамып келеді. Жастардың ойы ерекше. Сұраққа келсек, жақында мен өзіме анализ жасап, 2019 жылды қорытындыладым. Жыл мен үшін мықты жетістіктерге жеткен жылдарымның бірі болды, - деп бөлісті ойымен ол.
Қазақстандық брендтің негізін қалаушы қандай жетістіктерге қол жеткізгенін де айтып өтті.
Компаниямыз Қазақстанда ең алғашқы болып әлемдік танымал брендтердің модельдерімен жұмыс істей бастады. Одан соң онлайн платформаға көштік. Кейін бізде 1300 серіктес пайда болды. Біз халықтық жобамыз. Қарапайым отбасында өсіп, кейін Қазақстанға келдім. Мұнда мүмкіндік көп. Соларды қолдану арқылы аз уақыттың ішінде жақсы жетістіктерге қол жеткіздім. Сондықтан осы күнге дейінгі жинаған тәжірибемді, кәсібімді халықпен бөлісіп жүрмін. Серіктестерімізбен жиі шетелге шығып тұрамыз. Шетелге саяхаттау адамдардың, әсіресе, жастардың сана-сезімін өзгертеді. Соны ұйымдастырдық. Тамыз айында 6300 адамды жинап, фестиваль өткіздік. Онда елімізге белгілі эстрада әншілері өнер көрсетті. Осы жылы армандаған мақсаттарымның барлығы орындалып, табысты, жемісті, берекелі болды десем, қателеспегенім, - деді Рүстем Ермекбай.
Рүстемнің сөзінше, қазақстандық жастар өте ашық, жоқтан барды жасауға тырысады.
Көптеген елді көрдім. Кей мемлекетте жастардың көпшілігі болашаққа сенбейтін секілді немесе мүмкіндіктерін қолдана алмайтындай көрінеді. Қазақстандық, қазіргі, «Z ұрпағы» жоқтан бар жасауға тырысады. Таңқалатыным – Қазақстанның жастары өте ашық, - деді ол.
