«Жайлы мектеп» ұлттық жобасын салып жатқан әйгілі компания басшыларының қанша айлық алатыны белгілі болды, деп хабарлайды BAQ.KZ тілшісі.
Бұл туралы Samruk-Kazyna Construction басқарма төрағасы Мәулен Айманбетов компанияда өткен баспасөз мәслихатында мәлімдеді.
Тілшілер компания басшысынан ұлттық жобаның құрылысына басшылық ететіндердің аты-жөні мен олардың жалақы көлемін атауды сұрады.
Бұл жоба бойынша жұмыс істейтін адамдарға тоқталсам. Жобаға қатысты менің тікелей орынбасарым - Амангелді Саттаров. «Жайлы мектеп» жобасы бойынша департаменттің директоры Ербол Ахметов. Құрылыс бөлімінің басшысы Әбдікерім Шамов, Жобалау бөлімін Әнуар Хамит басқарады. «Жайлы мектеп» бойынша жұмыс істеуге жеткілікті бөлім деп ойлаймын, - деді басқарма төрағасы.
Сондай-ақ жобаны басқаратындардың айлығын айтты.
Өзімнің бекітілген жалақыма келер болсам, зейнетақы шегерімін есептемегенде, 1 млн 800 мың теңгені құрайды. Ал жобаға («Жайлы мектеп» - ред.) қатысты басшылардың айлығын сұрасаңыз, орынбасарым 1 млн 200 мың теңге, ал департамент директоры 940 мың теңге алады, - деп жауап берді Мәулен Айманбетов.
