Жаңа оқу жылының каникул күндері белгілі болды: Оқушылар қанша күн демалады?

Қазақстанда 2026-2027 оқу жылының басталу және аяқталу мерзімі, сондай-ақ оқушылардың каникул кестесі мен қорытынды аттестаттау күндері бекітілді.

Жаңа оқу жылы еліміздегі барлық орта білім беру ұйымында меншік нысанына қарамастан 2026 жылғы 1 қыркүйекте басталып, 2027 жылғы 25 мамырда аяқталады.

Оқу тоқсандарының ұзақтығы мынадай:

* I тоқсан – 8 оқу аптасы;
* II тоқсан – 8 оқу аптасы;
* III тоқсан – 10 оқу аптасы;
* IV тоқсан – 8 оқу аптасы.

Оқушылар қашан демалады?

2026-2027 оқу жылындағы каникул мерзімі де белгіленді.

Күзгі каникул – 2026 жылғы 26 қазан мен 1 қараша аралығы. Оқушылар 7 күн демалады.

Қысқы каникул – 2026 жылғы 28 желтоқсаннан 2027 жылғы 10 қаңтарға дейін. Демалыс ұзақтығы – 14 күн.

Көктемгі каникул – 2027 жылғы 22–28 наурыз аралығы, барлығы 7 күн.

Ал бірінші сынып оқушыларына қосымша демалыс қарастырылған. Олар 2027 жылғы 8-14 ақпан аралығында бір апта демалады.

Бітіруші сыныптардың емтиханы қашан өтеді?

9 (10)-сынып оқушыларының қорытынды аттестаттауы 2027 жылғы 31 мамырдан 11 маусымға дейін өтеді.

Емтихан күндері:

* 31 мамыр – математика (алгебра);
* 3 маусым – таңдау пәні;
* 7 маусым – оқыту тілі;
* 11 маусым – қазақ тілі мен әдебиеті немесе орыс тілі мен әдебиеті.

Ал 11 (12)-сынып түлектерінің мемлекеттік емтихандары 2027 жылғы 1-17 маусым аралығына жоспарланған.

Осылайша, келесі оқу жылында оқушылар төрт тоқсан білім алып, күзде – 7 күн, қыста – 14 күн, көктемде – 7 күн демалады. Бірінші сынып оқушыларына бұдан бөлек ақпан айында қосымша бір апталық каникул беріледі.