Нұр-Сұлтан, BAQ.KZ. ҚР Үкіметінің 20 сәуірдегі қаулысына сәйкес кезекті салықтық ынталандырулар топтамасы көзделуде, деп хабарлады ҚР Ұлттық экономика министрлігінің баспасөз қызметі.
Біріншіден, Мемлекет басшысының 2020 жылғы 31 наурыздағы мәлімдемесінде айтылған тапсырмаларды орындау үшін осы жылғы 1 сәуірден 1 қазанға дейін экономиканың көп зардап шеккен салаларындағы шағын және орта бизнес субъектілері салықтан және еңбекақы төлеу қорынан алынатын әлеуметтік төлемдерден (жеке табыс салығы, әлеуметтік салық, міндетті зейнетақы жарналары, міндетті медициналық сақтандыру және әлеуметтік аударымдар) босатылды.
Сауда, қоғамдық тамақтандыру, қонақ үй нысандары, көлік және консультациялық қызмет көрсету және ІТ саласын қосқандағы қызмет түрлерінің толық тізімі осы қаулының 1 қосымшасына сәйкес, бекітілген.
Бұдан басқа, 2 қосымшаға сәйкес, осы жылғы 1 сәуірден 1 шілдеге дейін жекелеген ірі кәсіпкерлік субъектілері жеңілдіктерді қолдану үшін зардап шеккен салалар бойынша қызмет түрлерінің тізбесі анықталды.
Екіншіден, әуе қатынасы саласында инфрақұрылымды қолдау және жұмыс орнын сақтау мақсатында ұшулар тоқтатылған кезеңде ынталандыру шаралары қабылданды: барлық әуежайлар осы жылғы 1 сәуірден 1 қазанға дейін мүлік салығынан босатылып, жыл соңына дейін әуе кемелеріне техникалық қызмет көрсету және лизингтік мәмілелерді заңдық сүйемелдеу бойынша бейрезиденттер үшін қосылған құн салығын төлеу ұзартылды.
Үшіншіден, осы жылғы 1 қазанға дейін жеке практикамен айналысатын тұлғалар (нотариустар, адвокаттар, сот орындаушылар, медиаторлар) мүлік салығынан босатылды. Бұдан бұрын, ірі сауда нысандары, сауда ойын-сауық орталықтары, кинозалдар, театрлар, көрмелер, спорттық нысандар, сондай-ақ қоғамдық тамақтандыру, қонақ үй, туристік қызмет нысандары жылдың соңына дейін мүлік салығынан босатылған болатын.
Төртіншіден, індетке қарсы іс-шараларға жұмылдырылған жұмыскерлер барлық салық түрлерінен және еңбекақы төлеу қорының әлеуметтік төлемдерінен босатылды.
Бесіншіден, салық төлеушілерге қолайлы болу үшін 2019 жылғы салықтық міндеттемелер есебі нысанын тапсыру мерзімі 2020 жылғы 31 наурыздан 2020 жылғы 31 мамырға ауыстырылды.
