Нұр-Сұлтан, BAQ.KZ тілшісі. Үкімет 2022 жылы 31 заң жобасын әзірлейді. Бұл туралы Әділет министрі Марат Бекетаев мәлім етті.
Ол 2022 жылға арналған Үкіметтің заң жобалау жұмыстары жоспарының жобасында 31 заң жобасын әзірлеу көзделгенін айтты.
Бірінші жартыжылдықта Парламентке – 11 заң жобасын және екінші жартыжылдықта 20 заң жобасын енгізу қажет. Жалпы, жоспар жобасы Президент пен мемлекеттің стратегиялық құжаттарында айқындалған міндеттер негізінде әзірленді, - деді министр.
Оның мәлімдеуінше, «Қазақстан Республикасының Әлеуметтік кодексі», «Кәсіби біліктіліктер туралы» және «Агломерацияларды дамыту туралы» заң жобаларын әзірлеу Мемлекет басшысының осы жылғы 1 қыркүйектегі Жолдауын іске асыру жөніндегі Жалпыұлттық іс-шаралар жоспарынан туындайды.
Бұдан басқа, тұтынушылардың құқықтарын қорғау, сәйкестікті бағалау және жылу энергетикасына қатысты жаңа заң жобаларын әзірлеу жоспарлануда. «Құқықтық актілер туралы» Заңға сәйкес жоспардың жобасы Мемлекет басшысымен келісуге жатады. Жоспар жобасын Президент Әкімшілігіне жіберу ұсынылады, - деді Үкімет отырысында Марат Бекетаев.
