QAZCONTENT басшысы БАҚ-ты жалған ақпаратпен күреске жұмылдыруды ұсынды

Бейжіңде өткен 7-ші Дүниежүзілік медиа-саммитте «QAZCONTENT» АҚ басқарма төрағасы Әділ Сейфуллин жасанды интеллект журналистердің жұмысын қалай өзгертіп жатқаны, ұлттық контент үшін қандай мүмкіндіктер ашатыны және жарияланымдар үшін жауапкершілік неліктен редакцияда қалатыны туралы айтып берді. Ол компанияның тәжірибесімен бөлісіп, фактілерді тексеруде және ақпараттық бұрмалаушылықтарға (фейктерге) қарсы тұруда БАҚ ынтымақтастығын дамытуды ұсынды, деп хабарлайды BAQ.KZ тілшісі.

«QAZCONTENT» қазақ, орыс және ағылшын тілдерінде жаңалықтар таратып, жастарға арналған, тарихи, әдеби және мультимедиялық жобаларды дамытып келеді. Әділ Сейфуллиннің айтуынша, бұл ресурстардың әртүрлілігі технологияларды енгізу тәсілін де айқындайды: құралдар әрбір жобаның нақты міндеттерін шешуге көмектесуі тиіс.

Компания басшысының айтуынша, компания көрсеткіштерінің артында оқырмандардың әртүрлі қызығушылықтары жатыр. Бір пайдаланушылар үшін жедел жаңалықтар маңызды болса, енді біріне ел тарихына қатысты материалдар немесе әдебиет әлемімен танысу қызықты. Сондықтан барлық ресурсқа бірдей қолдануға болатын жасанды интеллектіні енгізудің бірыңғай тәсілі жоқ.

Сервистерді сынақтан өткізуден бастап жеке көмекшілерге дейін

Жасанды интеллект QAZCONTENT редакцияларының күнделікті жұмысында қазірдің өзінде қолданылып келеді. Ол құжаттарды жылдам саралауға, материалдарды аударуға және жаңа форматтар жасауға көмектеседі. Сонымен қатар сервистерді жұмыс үдерісіне енгізбес бұрын олардың тиімділігі тәжірибе жүзінде бағаланады.

«Компанияда жасанды интеллект мәселелері жөніндегі кеңес жұмыс істейді. Біз апта сайын жаңа құралдарды, халықаралық тәжірибені, деректер қауіпсіздігін және редакция үшін туындауы мүмкін тәуекелдерді талқылаймыз. Ал AI Lab зертханасы тәжірибелік алаңға айналды. Мұнда журналистер, редакторлар мен мультимедиялық топтар сервистерді күнделікті жұмысқа енгізбес бұрын сынақтан өткізеді», – деді Әділ Сейфуллин.

Жұмыс нақты міндеттен басталады: мамандар алынған нәтижені бағалап, қай кезеңде тексеру жүргізу қажеттігін анықтайды. Қызметкерлер жасанды интеллектіні сұхбаттарды мәтінге түсіру, құжаттарды талдау, аудару, графикалық материалдар мен анимациялар әзірлеу кезінде қолданады. Олардың көпшілігі өздерінің жұмыс міндеттеріне бейімделген жеке көмекшілерін де жасап алған.

Әділ Сейфуллиннің айтуынша, мұндай тәжірибе технологиялардың мүмкіндіктерін ғана емес, редакцияларда күнделікті жұмыста кездесетін қиындықтарды да талқылауға мүмкіндік береді.

Жаңа сервистерді әзірлеудегі редакциялық архивтердің рөлі

Тағы бір маңызды бағыт – редакциялардың жинақталған материалдарын пайдалану. Осы орайда Сейфуллин Қытайдың «Синьхуа» ақпарат агенттігінің тәжірибесіне назар аударды.

Оның айтуынша, 2026 жылдың маусым айында агенттік өз деректері мен ірі тілдік модельдер негізінде жұмыс істейтін жасанды интеллект көмекшісін таныстырған. Оның негізгі функцияларының қатарында ақпараттың бастапқы дереккөздерін іздеу және жаңалықтарға қатысты сұрақтарға жауап беру мүмкіндіктері бар.

QAZCONTENT үшін бұл тәжірибе редакциялық архивтермен жұмыс істеу тұрғысынан қызығушылық тудырады. Жылдар бойы жинақталған материалдар оқырмандарға Қазақстанның тарихы, мәдениеті мен қазіргі өмірі туралы мәліметтерді оңай табуға көмектесетін жаңа сервистерді әзірлеуге негіз бола алады.

Соңғы екі жылда QAZCONTENT мамандары мыңға жуық адамды оқытқан. Олардың қатарында журналистер, министрліктердің, мемлекеттік органдар мен ұлттық компаниялардың баспасөз қызметтерінің қызметкерлері бар. Оқыту бағдарламасы құжаттармен, бейнематериалдармен және суреттермен жұмыс істеуді, сондай-ақ дербес және қызметтік деректерді қорғау мәселелерін қамтиды.

Цифрлық жүргізушілер мен анимация

Компанияның интернет-ресурстарында жасанды интеллектінің көмегімен жасалған контенттің түрлі форматтары қолданылып келеді. BAQ.KZ сайтында цифрлық аватар әлеуметтік желілерде жаңалықтар дайджестін жүргізеді.

EL.KZ порталында ағылшын тілінде хабар тарататын цифрлық жүргізуші жұмыс істейді. Ал «El kids» арнасы үшін анимациялық сериал әзірленген. Оны дайындау барысында жасанды интеллект кейіпкерлерді, фондар мен көріністерді жасауға көмектескен.

Тарихи және әдеби порталдар аудиторияны тарихпен және қаламгерлердің шығармаларымен таныстыру мақсатында қысқа анимацияларды, архивтік суреттер мен көркемдік интерпретацияларды пайдаланады. Алайда мұндай форматтарды әзірлеу ерекше мұқияттылықты талап етеді: көрермен деректі материал мен көркемдік реконструкцияның аражігін ажырата білуі керек.

Қателіктің құны және редакция жауапкершілігі

Технологиялық мүмкіндіктердің кеңеюі нақты әрі түсінікті ережелерді қажет етеді. Әділ Сейфуллин контент дайындау жылдамдығы оның шынайылығы мен дәйектілігіне қойылатын талаптарды төмендетпеуі керектігін атап өтті.