Қырғызстанда селден қайтыс болған балалардың денесі елге жеткізіледі, деп хабарлайды BAQ.KZ Төтенше жағдайлар министрлігіне сілтеме жасап.
Қырғызстан ТЖМ ақпараты бойынша, Ош облысының Ноокат ауданы Абшыр-Ата ауылында сел тасқынының салдарынан Қазақстанның кәмелетке толмаған екі азаматы қаза тапты. Тағы екеуі хабар-ошарсыз кетті деп саналады. Қырғыз құтқарушыларының күштерімен іздестіру жұмыстары жүргізілуде, - делінген хабарламада.
Айта кетейік, Қазақстан мен Қырғызстан ТЖМ басшылары орын алған табиғи сипаттағы ТЖ салдарынан кейін тікелей байланыста. Барлық қажетті үйлестіру және ақпарат алмасу жұмыстары жүзеге асырылуда.
Қазақстан ТЖМ Ош қаласына қаза тапқан азаматтардың денелерін тасымалдау үшін әуе кемесін жіберу мәселесін пысықтап жатыр.
Еске сала кетейік, бұған дейін Ош облысындағы сел тасқынынан екі қазақстандық жасөспірімнің денесі табылғаны туралы жазған болатынбыз.
