ТЖМ Азаматтық қорғаныс және әскери бөлімдер комитетінің аға офицері Ерасыл Сайпаш Орталық коммуникациялар қызметінің алаңында өткен брифингте су тасқыны жағдайы туралы осы сағаттағы ақпаратты ұсынды, деп хабарлайды BAQ.KZ.
Айтуынша, еліміздің өңірлерінде су тасқыны салдарын жою жұмыстары жалғасуда.
4 134 тұрғын үй мен 2 698 аула аумағында судың бағыты бұрылды. Осы сағатта 18 651 адам өз үйлеріне оралды. 6 932 адам, оның ішінде 3 143 бала эвакуациялау пункттерінде. Су тасқыны басталғалы бері барлығы 117 617 адам, оның ішінде 43 887 бала құтқарылып, эвакуацияланды. 113 852 ауыл шаруашылық жануарлары қауіпсіз жерге айдалды, - деп атап өтті ведомство өкілі.
Сонымен қатар ол 10 млн астам текше метр еріген қар суы сорып шығарылды, 3,1 млн астам қапшық және 1,4 млн астам тонна инертті материал төселгенін алға тартты.
Ақмола, Ақтөбе, Қостанай, Атырау, Солтүстік Қазақстан облыстарында 5 798 жеке тұрғын үй, 1 130 аула аумағы су астында қалуда. Зардап шеккен өңірлерге теміржол, автомобиль көліктерімен және әуе кемелерімен 4 211 тонна гуманитарлық көмек жеткізілді. Торғай өзені су деңгейінің көтерілуі қаупіне байланысты Ақтөбе облысы Ырғыз ауданы Құйлыс ауылының тұрғындары алдын ала эвакуацияланды. Ырғыз ауданында жағалауды бекіту және гуманитарлық көмек жеткізу жұмыстары жүргізілуде. Торғай өзені су деңгейіне мониторинг жүргізілуде, - деді спикер.
Авариялық-құтқару және су тасқынына қарсы жұмыстарға 43 976 адам, 4 633 техника, 860 су сору құралы, 332 жүзу құралы, 17 әуе кемесі жұмылдырылды.
