Нұр-Сұлтан, BAQ.KZ. Отырар ауданы ПБ кезекші бөліміне жергілікті тұрғын көмек сұрап келген. Ол өзінің 3 жасар қызының үй ауласында ойнап жүріп, шығып кеткенін айтқан. Бұл туралы ТО ПД баспасөз қызметі хабарлады.
Хабарды алған Отырар ауданы ПБ-ның Жергілікті полиция бөлімшесінің патрульдік полиция тобының қызмет инспекторлары полиция лейтенанты Қуаныш Сәтпаев пен полиция лейтенанты Жанарбек Нұрдаулет жоғалған баланы іздеуге бірден кірісті.
Тәртіп сақшылары жан-жақты түгел шолып шығып, кішкентай қыздың жүруі мүмкін жерлердің барлығын мұқият тексерді. Полиция қызметкерлерінің тынымсыз еңбектерінің нәтижесінде 3 жасар бүлдіршін 5 шақырым қашықтықтағы жердегі көпқабатты үйлердің арасында ойнап жүрген жерінен табылды.
Өз кезегінде отырарлық сақшылардың жеделділігіне риза болған анасы, өз алғысын жеткізді. Полиция қызметкерлеріне рақмет. Небары 1 сағаттың ішінде жоғалған қызымды тауып берді. Істеріңіз алға баса берсін!-деп шынайы алғысын айтты.
