Нұр-Сұлтан, BAQ.KZ. Бүгін Халықаралық Түркі академиясы түркі әлемінің тұғырлы тұлғасы, кемеңгер ойшыл, абыз ақын Әлішер Науаидың туғанына 580 жыл толуына орай «Шығыстың жарық жұлдызы» атты шара өткізді.
Түрік тілі жылы аясында ұйымдастырылған алқалы жиынға Халықаралық Түркі академиясының президенті Дархан Қыдырәлі, Өзбекстан Республикасының Қазақстан Республикасындағы Төтенше және өкілетті елшісі Саидикрам Ниязходжаев, ҚР Парламенті Мәжілісінің депутаты Фахриддин Каратаев, С.Сейфуллин музейінің директоры, ақын, аудармашы Несіпбек Айтұлы, Қазақстан Жазушылар Одағы Нұр-Сұлтан қалалық филиалының директоры Дәулеткерей Кәпіұлы, Әлішер Науаи атындағы Ташкент өзбек тілі және әдебиеті университетінің ректоры, профессор, филология ғылымдарының докторы Шухрат Сирожиддинов, Мичиган университеті жанындағы Еуропа, Ресей және Еуразиялық зерттеулер орталығы директорының орынбасары, профессор Тимур Қожаоғлу, Өзбекстан Республикасының Мемлекеттік сыйлығының лауреаты, ақын, Өзбекстан Жазушылар одағының мүшесі, халық жазушы Мұхаммед Әли, Еуразия Жазушылар Одағының төрағасы Якуп Омероглу, Баку Ұлттық университеті әдебиет кафедрасының меңгерушісі, профессор Рамиз Аскер, Қырғызстандағы Жалал-Абад мемлекеттік университетінің профессоры, филология ғылымдарының докторы Ибраим Абдувалиев, Ыстамбул мәдениет университетінің профессоры Вахит Түрк және түркі елдерінің белгілі мемлекет және қоғам қайраткерлері, танымал ғалымдар мен зиялы қауым өкілдері қатысты.
Онлайн/оффлайн режимде өткен жиынды жүргізіп отырған Академия басшысы Дархан Қыдырәлі Әлішер Науаи жылы аясында атқарылатын шаралар мен арнайы жобаларды баяндап берді.
Сонымен қатар басқосуға қатысушылар Науаи мерейтойын атап өтудің маңыздылығына тоқталып, ұлы ойшылдың шығармашылығы туралы орамды ойларымен бөлісті.
Шара соңында Өзбекстан елшісі Саидикрам Ниязходжаев Академия президентіне ризашылығын білдіріп, арнайы құрмет көрсетті.
Айта кетейік, өткен жылы Түркі академиясы Әлішер Науаидың «Хамса» топтамаларына енетін бірнеше әйгілі жырын қазақ тіліне аударып, бірегей басылым ретінде жарыққа шығарған болатын. Биыл ақын туындыларын бауырлас түркі елдері тілдеріне аударып, басып беру жұмыстары жалғасын табатын болады.
