Нұр-Сұлтан, BAQ.KZ тілшісі. Мәжіліс депутаты Дүйсенбай Тұрғанов медициналық қалдықтарды жөнге салмау қазақстандықтардың денсаулығы мен қоршаған ортаға айтарлықтай қауіп төндіретінін айтты.
Депутат осы мәселеге қатысты Премьер-министрінің бірінші орынбасары Роман Склярдың атына жолдаған депутаттық сауалында көтерді.
Депутаттың айтуынша, медициналық қалдықтардың өсу проблемасы, әсіресе, бүгінде коронавирустық пандемия кезінде, соның ішінде, еліміз үшін өте өзекті. Мәжілісмен атап өткендей, медициналық қалдықтармен дұрыс жұмыс істемеу халықты инфекция жұқтыру қаупіне ұшыратады.
Бір рет қолданылатын шприцтерді, тамызғыштарды, таңғыштарды дезинфекциялау режимінің бұзылуына байланысты жиі дезинфекцияланбаған қалдық медициналық мекемелердің қоқыс контейнерлеріне тасталады, бұл одан әрі әртүрлі инфекциялардың пайда болу және таралу қаупін тудырады. Медициналық қалдықтарды өңдеу және кәдеге жарату қоршаған ортаға патогенді немесе улы ластаушы заттарды шығару арқылы жанама түрде денсаулыққа қауіп төндіруі мүмкін. Мысал ретінде Атыраудағы тұрмыстық қатты қалдықтар полигонының артында қоршалған жеке аумақты анықтаған «Атамекен Эко» қоғамдық қорының бір топ табиғат қорғау белсенділерінің үндеуін айтуға болады, - деді Дүйсенбай Тұрғанов.
Оның сөзінше, бұл жалғыз жағдай емес. Мұндай мәселелер депутаттар тарапынан бірнеше рет көтерілген.
Денсаулық сақтау және Экология, геология және табиғи ресурстар министрліктері тарапынан жасалып жатқан шаралар жеткіліксіз екені анық. Атап айтқанда, сапасыз кәдеге жарату себептерінің бірі аталған қызметтерді лицензиялауға жататын қызмет түрлерінің тізбесінен алып тастау болып табылатыны. Алайда министрлік әлі заңнамаға тиісті өзгерістер енгізуге бастама көтерген жоқ. Мұндай кәсіпорындарға Экологиялық кодекске сәйкес белгілі бір талаптар қойылуы тиіс. Бұл талаптар орындалып жатыр ма, оны кім бақылайды? Қайта өңдеу қызметін ұсынатын компанияларда мұндай қондырғылар бар ма және олар қажетті талаптарға сай ма? Медициналық қалдықтарды кәдеге жарату ережелерін бұзғаны үшін қолданылатын жазалар қаншалықты тиімді? – деп депутат сауалдарын қойды.
Мәжілісменнің айтуынша, мәселені «қолмен басқару» режимінде шешу мүмкін емес, кешенді тәсіл қажет.
Осыған байланысты Мәжілісмен медициналық қалдықтарды кәдеге жарату бойынша қызмет көрсететін кәсіпорындардың қызметіне бақылауды күшейту, нақты стандарттар әзірлеу арқылы қажетті құрал-жабдықтарды кәдеге жарату бойынша қызмет көрсететін кәсіпорындарға қойылатын талаптарды күшейту, сондай-ақ қажетті құжаттарды әзірлеу қажет деп санайды.
