Бүгін өтіп жатқан Мәжілістің жалпы отырысында депутат Бақытжан Базарбек министрліктерге сұрақ қоямын деп Мәжіліс спикерінен сөз естіп қалды, деп хабарлайды BAQ.KZ тілшісі.
Бірінші жалынды сәлемімді Тамара Дүйсенқызына жолдаймын. Бір-екі жыл бұрын Президенттің көмекшісі болып тұрған кезіңізде сізбен видеоконференцияға шыққанбыз. Сонда Солтүстік Қазақстан облысында Бостандық деген ауыл бар. Ауыл тұрғындары жайылымдық жерлерінен айырылып қалған. Сіз жеке маған және ауыл тұрғындарына уәдеңізді төгіп-төгіп бергенсіз. Мен әп-әдемі, түк білмегендей енді министрдің қызметіне отырдыңыз. Сондықтан мына жерде осы мүмкіндікті пайдаланып сізге ауыл тұрғындарынан жалынды сәлемімді жеткізіп отырмын, - деді мәжілісмен ведомство басшысына қарата.
Сондай-ақ мәжілісмен Ауыл шаруашылығы вице-министрі Әбілхайыр Тамабекке жұмыс істемесеңіздер, қуып шығамыз деді.
Егер жұмыс істей алмасаңыздар, министрмен қоса министрліктен қуып шығамыз. Аямаймыз, - деді Бақытжан Базарбек Ауыл шаруашылығы министрлігінің өкіліне.
Мәжіліс спикері Ерлан Қошанов болса, депутатқа регламентті бұзбауын сұрап, ескерту жасады.
Құрметті, Бақытжан Жұмабекұлы! Бірінші кезекте депутаттық этика деген бар. Сіз қатты кетпеңіз! Агрессиясыз сөйлеңіз. Екіншіден, мен жақтап отырғаным жоқ. Қойып отырған сұрағыңыз дұрыс. 10 млн гектарға жуық жер қайтарылды. Бұл бірінші кезекте «Жер аманаты» комиссиясының жұмысы. Енді оны әрі қарай бөлу кезінде әділ бөлініп жатыр ма, жоқ па, сол ғой сіздің сұрағыңыз. Ол ең алдымен жергілікті әкімдердің, екінші кезекте осы құзыретті органдардың мәселесі, солардың жауапкершілігі. Екіншіден, «Жер аманаты» комиссиясының құрамына Бас прокуратура да, Ауыл шаруашылығы министрлігінің басшылығы, Жер ресурстары комитетінің басшысы, депутаттар, сонымен қатар қоғамдық белсенділер, қоғам өкілдері де кіреді. Оның басшысының бірі өзіңізсіз. Сондықтан мен де сізге жалынды сәлем айтқым келеді. «Жер аманаты» комиссиясы да осы мәселеге қатысты әр жағында қалай әділ бөлініп жатыр, соны қадағалауға, бақылауға барлық құзіретті бар. Бұл мәселені жергілікті билік өкілдері де, министрлік те қарауы керек. Комиссия да жауапты. Бірақ сұрақ қойғанда, Бақытжан Жұмабекұлы, бұл бірінші рет емес, сізге сұрақ қойғанда регламентті қамтамасыз ететін палатаның басшысы ретінде ескерту жасаймын, - деді Ерлан Қошанов.
