Циндао: Дәстүр мен инновациялық бизнестің үйлескен жері

Қытайдың Шаньдун провинциясында орналасқан қаланың бірі – Циндао. Циндаоны көбіне «Сары теңіздің інжу-маржаны» деп атады. Ол әлемге өзінің сырасымен және жаңа технологиясымен танымал, деп хабарлайды BAQ.KZ тілшісі.

Сиань қаласында өткен «Қытай-Орталық Азия» саммитіне қатысқан Орталық Азия елдері журналистері Циндао қаласымен танысып, көркем жерлерін аралады.

Циндао Сары теңіз жағалауында және Шаньдун түбегінің оңтүстік бөлігінде орналасқан. Бұл - Қытайдың солтүстігіндегі ашық жағалаудағы табиғи ресурстарға толы қала. Сондай-ақ Циндао Қытайдың туризм, халықаралық порт және ұлттық мәдени-тарихи қаласы саналады. Циндаоға 10 миллионнан астам тұрғыны бар жеті аудан және үш уездік қала кіреді.

Циндаоны Лаошань таулары алып жатыр. Оның, биіктігі 1 113 метр және ол даосизмнің туған жері ретінде белгілі.

Қытайда орташа жас ұзақтығы 72 жас болса, Шаньдун провинциясында 80 жас. Бұл өңір халқы өзінің қонақжайлығымен танымал.

Циндао «Қытай-ШЫҰ» өңірлік сауда-экономикалық ынтымақтастықтың пилоттық аймағын және Шаньдун провинциясының еркін сауда эксперименттік аймағының Циндао учаскесін құру жөніндегі ұлттық стратегиялық міндетті өз мойнына алған. Қала жаңа батыс жағалау аймағы, жоғары технологиялық өнеркәсіптік даму аймағы және Цзяодун әуежайының экономикалық демонстрациялық аймағы сияқты көптеген ұлттық деңгейдегі функционалды аймаққа ие. Сонымен қатар Haier, Hisense, Tsingtao Beer, CRRC SRI сияқты әлемге әйгілі брендтердің, жаңа салалардағы жетекші кәсіпорындар, мысалы SiEn, BOE, Goertek және Genova, TELD, COSMOPlat сияқты компаниялардың отаны.

Циндаоның мәдени және ғылыми жетістіктеріне кино және теледидар индустриясы, сондай-ақ бірнеше ірі теңіз ғылыми орталықтары кіреді. Неміс билігі кезінде өткізілген кезеңді қамтитын қаланың бай тарихи мұрасы ерекше ғимараттардан және әлемге әйгілі «Циндао» сыра қайнату зауытынан көрінеді.

Қалада 5 вокзал бар. Циндаодағы пойыздар сағатына 300 шақырымнан 380 шақырымға дейінгі жылдамдықпен жүреді.

Мұнда қыс аязды емес, жаз ыстық емес. Тау мен теңіз, қалаға ерекше көрік беріп тұр. «Қызыл тақтайшалар, жасыл ағаштар, көгілдір теңіз, көк аспан» - бұл қаланың фоны және Циндаоның мәңгілік символы. Ал әртүрлі стильдердегі ғимараттар қалаға сүйкімділік беріп тұр. Ерекше табиғатымен танымал Циндао «Қытайдың ең экологиялық бәсекеге қабілетті қаласы» ретінде таңдалған.

Циндао сәнге, энергияға, жылулыққа және романтикаға толы қала. Бұл әйгілі футбол қаласы, кино қаласы, желкендер мен сыралардың астанасы, өнер қаласы саналады.

Жетекші, инновациялық, тораптық және бірлескен типті дамыту бағытын ұстана отырып, Циндао заманауи өнеркәсіп саласында пионер қаласын, жетекші заманауи теңіз қаласын, халықаралық инновациялық қаланы, маңызды халықаралық тораптық қаланы, өмір сүруге, бизнес пен туризмге жарамды бірінші дәрежелі порт қаласын, сондай-ақ заманауи басқару үшін үлгілі қаланы белсенді түрде құрып жатыр.

Циндаода жоғары деңгейдегі іс-шаралар жиі өтеді. Мысалы, 2018 жылы Шанхай Ынтымақтастық Ұйымының (ШЫҰ) саммиті ойдағыдай өткізілген.

2021 жылы Циндаода теңіз кеме жасаудан бастап ауыл шаруашылығы мен жасыл энергетикаға дейінгі әртүрлі салалардағы муниципалдық жобалардың кең ауқымын инвестициялауға және жүзеге асыруға ерекше назар аударыла бастады.

Өзбекстандық журналист Руслан Кенжаев Циндао достықтың қаласы екенін айтады.

Циндао қаласында бауырластық пен достықтың жылы рухы бар. Қалада болған қысқа уақыт ішінде Циндао өзінің даму динамикасымен ғана емес, сонымен қатар тұрғындардың қонақжайлылығымен таң қалдырды. Бұл оның шетелдіктер мен туризм үшін үздік қала атағын растайды. Ұйымдастырушылар Циндаоны журналистердің алдына әр қырынан көрсетуге тырысты. Біз мұнда өзімізді кино жұлдыздары, шебер сыра қайнатушылар сияқты сезіндік. Сондай-ақ, Шандун провинциясының ежелгі дәстүрлерімен байланысқа түсіп, заманауи пойыздардың жылдамдығы адамдарды, қалалар мен мемлекеттерді қалай жақындастыратынын өз көздерімен көрді, - деді Руслан Кенжаев.

2021 жылдың алғашқы үш тоқсанында қаланың ЖІӨ 1031,036 миллиард юаньға дейін өсті. Бұл жалпы Қытайдан да, провинциядан да сәл жоғары. Сонымен бірге тұтыну тауарларын сату көлемі 40,03 млрд юаньға жетіп, 18%-ға өсті, ал қалаға ұзақ мерзімді инвестициялар көлемі 10,9%-ға өсті.

Айта кетсек, Қазақстан мен Қытай арасындағы тауар айналымы соңғы дерек бойынша 28,22 млрд долларға жетіп, 23,1 пайызға өсті.

Бұған дейін Циндаода орналасқан «Қытай-ШЫҰ пилоттық аймағының інжу-маржаны» халықаралық ЭКСПО орталығында Қазақстан павильоны жұмыс істеп тұрғанын хабарлаған болатынбыз.