Үкіметтің кеңейтілген отырысында Президент Қасым-Жомарт Тоқаев Үкімет басы артық бюрократиядан арылып, жедел жұмыс істеуі керек екенін ескертті, деп хабарлайды BAQ.KZ тілшісі.
Тоқаев Үкіметтің және басқа да құзырлы органдардың жақын арадағы негізгі міндеттеріне тоқталды.
Президент мәлімдегендей, былтыр өңдеу өнеркәсібі саласында 180 инвестициялық жоба жүзеге асырылды. Жобалардың жалпы құны – 1,3 триллион теңге. Соның нәтижесінде осы саладағы өсім 6 пайызға жуықтады. Бұл – соңғы он жылдағы ең жоғары көрсеткіш. Осы жақсы үрдісті біржола орнықтырып, сақтап қалу керек.
Тағы бір аса маңызды мәселе – экономикаға инвестиция тарту. БҰҰ мәліметтеріне сәйкес, Қазақстан бұл көрсеткіш бойынша айтарлықтай табысқа қол жеткізген. Дегенмен тоқмейілсуге негіз жоқ. Инвесторлардың мәселесін шұғыл шешу үшін Инвестиция штабы құрылды. Соның арқасында бюрократиялық кедергілер мен құқықтық қарама-қайшылықтар жойылып, кейбір жобаларды тезірек жүзеге асыруға жол ашылды. Алайда басты мақсат – “жекелеген” проблемаларды ғана шешпей, елдегі тұтас инвестициялық ахуалды жақсарту, - дейді Қасым-Жомарт Тоқаев.
Үкіметтің кеңейтілген отырысында айтқан сөзінде Президент инвестициялық жобаларды әзірлеу барысында ведомствоаралық үйлестіруге әлі де көп уақыт кететінін айтты. Тоқаев Үкімет басы артық бюрократиядан арылып, жедел жұмыс істеуі керек екенін ескертті.
Мемлекеттік қызметшілердің құлықсыздығы және жауапкершілік алудан тайсалуы келісу рәсімдері мен шешім қабылдаудың тым ұзаққа созылуына себеп болып отыр. Мұны ашық айтқан абзал, - деп тапсырды Тоқаев.
Айта кетейік, осыған дейін Мемлекет басшысы қаншалықты қиын болса да Үкімет жаппай үнемдеуге көшіп, бюджет қаржысын тек қана аса өзекті мәселелерді шешуге жұмсауы керегін айтты.