Нұр-Сұлтан, BAQ.KZ. Тараз қаласының полиция бөліміне жергілікті қарт тұрғын жүгінді, деп хабарлады қалалық ПД баспасөз қызметі.
Ол наурыздың 7-сі мен 8-і аралығында белгісіз тұлғалар оның үйінің қақпасын жасырын ұрлап кеткені туралы хабарлады.
Белгісіз адамдар құлыпты бұзып, үйге кіріп, тұрмыстық құралдарын да алған. Келтірілген залалдың көлемі шамамен 70.000 теңгені құрайды.
Жедел-іздестіру іс-шаралары барысында полиция қызметкерлері облыс орталығының 30 және 21 жастағы тұрғындарын анықтап, ұстады. Ұсталған азаматтар кінәсін толық мойындады. Заттай дәлелдемелер алынды.
Күдіктілердің пайда табу мақсатында ұрлық жасағаны анықталды. Сондай-ақ, 21 жастағы ұсталған адамның осыған ұқсас қылмысы үшін бұрын да сотты болғаны белгілі болды, - делінген ақпаратта.
Аталған дерекке қатысты Қазақстан Республикасы Қылмыстық кодексінің 188-бабы 3-бөлігі бойынша сотқа дейінгі тергеу амалдары басталды. Осы баптың санкциясы 2 жылдан 7 жылға дейінгі мерзімге бас бостандығын шектеуді не мүлкін тәркілей отырып, сол мерзімге бас бостандығынан айыру түріндегі жаза көзделген.
