Күннің жылынуына байланысты Тараз қаласында қаңтар айында жауып, бірнеше апта жатқан қалың қар ери бастады. Жамбыл облысы орталығындағы қала көшелері мен тұрғын үйлерді су басудың алдын алу мақсатында жолдар мен арық жүйелерін тазалау жұмыстары жүргізіліп жатыр. Бұл туралы BAQ.KZ тілшісі хабарлайды.
Сонымен қатар Тараз қаласын іргелей ағатын Талас өзенінде жағажай бекіністері жүргізілуде.
Естеріңізге сала кетейін, 2016 жылы жауған нөсер жаңбыр мен Талас өзеніне құйылған судың көбеюі жағалаудың шайылуына әкеп соққан болатын, соның салдарынан ондаған шаруашылық учаскелері су астында қалды. Бұл жағдайдың қайталанбауы үшін жергілікті атқарушы органдар тиісті шаралар қолға алынып жатқанын айтты Тараз қаласы әкімінің орынбасары Нұрбол Қалдыбаев.
«Былтырдан бері Талас өзенінің жағалауын нығайту жұмыстары жүргізілуде. Ол үшін республикалық бюджеттен қаржы бөлініп жатыр. Өткен жылы – 1 миллиард теңге, биыл – 1 миллиард 600 миллион теңге қаралды. Тапсырыс беруші – облыс әкімдігінің құрылыс басқармасы. Қазіргі уақытта жалпы ұзындығы сегіз шақырымды құрайтын жағалау учаскелері күшейтілу үстінде. Бұрын суға кеткен ең қауіпті аймақтардан бастадық шаруаны. Жұмысты күзге дейін аяқтаймыз деп жоспарлап отырмыз, – деді әкімдік өкілі.
Қала әкімінің орынбасары биыл да қаладан Алматыға шығатын жолдағы Талас өзені арқылы өтетін көпірді қайта жаңғырту жоспарланып отырғанын атап өтті. Оның оң жағын жөндеу 2007 жылы жүргізілген. Қазіргі уақытта сол жағын жаңғырту қажет.
«Жобалық-сметалық құжаттаманы әзірлейтін және құрылымды жөндейтін мердігерді анықтауға қазірдің өзінде конкурс жарияланды. Жобада көпірді кеңейту, оны нығайту және тіректерге тұрақтандырғыштар мен толқын суытқыштар орнату қарастырылған», - деп қосты Нұрбол Қалдыбаев.
Қала арқылы сегіз канал өтеді, оның ішінде екі дренаждық канал бар. Массивтерді су басып кетпеу үшін қар тазалауға коммуналдық қызметкерлер мен техника жұмылдырылған. Соның нәтижесінде Сеңкібай көшесінің бойындағы Қапал каналы тазартылды. Базар аумағындағы арық желілері, Қарасу-1 және Қарасу-2 су бұру каналдарының көздері аршылды.
«Қаладан биыл жеті мың текше метрге жуық қар шығарылды. Бұл бағытта күніне 300 адам жұмыс істеп жүр, 70 техника пайдаланылады. Бұл көшелер мен жеке үйлерді су басып қалу мүмкіндігін болдырмау үшін жасалып отыр», - деп түсіндірді Тараз қалалық Төтенше жағдайлар бөлімінің бас маманы Арман Смайылов.
Оның айтуынша, төтенше жағдай орын алған жағдайда оны жоюға жеке құрам мен басқару құралдары дайын.
