Нұр-Сұлтан, BAQ.KZ.Түркістан қаласында жерді жел эрозиясынан сақтау, көгалдандыру мақсатында Түркістан қаласының айналасында "Жасыл белдеу" қалыптастырылады, деп хабарлады Түркістан облысы әкімінің баспасөз қызметі.
Жоспар бойынша "Жасыл белдеу" аймағында 2019-2021 жылдар аралығында көшеттер отырғызылып, орман алқабын ұлғайту арқылы жасыл аймақ қалыптастыру жоспарланған.
Осы орайда, 2019 жылдың көктемінде 160 мың көшет отырғызылса, күзгі мезгілде 2000 га жерге 478 мың көшет және 300 га тәлімбақта 400 мыңға жуық сеппе көшет отырғызу жоспарлануда.
"Жасыл белдеудің жалпы аумағы 7700 га жерді құрайды. Соның ішінде 7500 га жерге 3,5 млн екпе ағаш пен 500 мыңға жуық бұта егілмек", - делінген хабарламада.
Атап айтқанда, ұсақжапырақты шегіршін, үлкенжапырақты шегіршін, қарағай, жіңішкежапырақты жиде, терек, үйеңкі, қытай шағаны, сүйелді қайың, емен, сарғылт қарақат және т.б егіледі.
"Жасыл белдеу" аймағына кіретін жерлердің орманға жарамсыздығын ескере отырып, алдағы уақытта 7700 га жерде жобалау-іздестіру жұмыстарының төрт кезеңі жүзеге асырылмақ.
2020 жылдан бастап, ғылыми зертханаларды тарта отырып, облыс әкімдігі тарапынан "Жасыл белдеудегі" тәлімбақта Түркістан қаласының климатына тез бейімделетін екпе көшет және көпжылдық гүлдейтін шөптерді сұрыптау бойынша жұмыс атқарылатын болады.
Келер жылдың көктемінде тәлімбақта облыста және елімізде жоқ, өзге мемлекеттерде өсетін өсімдіктерді жерсіндіру бойынша тәжірибе жасау жоспарланып отыр. Бұл өз кезегінде кейбір қылқанжапырақты тұқымдас түрлерін Түркістан қаласының айналасындағы "Жасыл белдеуде" өсіру үшін бейімдеу мақсатында жүзеге асырылмақ.
