Нұр-Сұлтан, BAQ.KZ. Түркістан облысы, Келес ауданына қарасты Амангелді елдімекенде «ақылды» мал бордақылау алаңы іске қосылды, деп хабарлайды Түркістан облысы әкімінің баспасөз қызметі.
Құрылысы 2 жылға жалғасқан алаңның жалпы аумағы 0.5 га. 300 мал басына есептелген шаруашылыққа «ангус» тұқымды 32 бас ірі қараны Солтүстік Қазақстан облысынан алдырған. Мұндағы барлық «қара жұмысты» арнайы қондырғы, робот атқарады. Мал шаруашылығын кәсіп еткен жергілікті тұрғын Дәурен Әлімбаев осылайша өз арманын жүзеге асырған.
Хобби ретінде бастап, ізденіп, тиісті мамандардан кеңес алдым. Бұл саланың сырларын жетік білмегендіктен, қиындықтарға тап болғаным рас. Аудан әкімінің қабылдауында болып, құжаттандыру, субсидиялау жағынан көмек сұрадым, – дейді жеке кәсіпкер.
Роботтандырылған мал бордақылау алаңында 1 ғана адам жұмыс істейді. Жұмыстың басым бөлігін Ресейден сатып алынған «малақ тазалау» құрылғысы атқарады. Кәсіпкер бизнесін ары қарай дамыту үшін мемлекеттен аз мөлшерлі пайызбен несие алмақ. Осылайша шаруашылығын кеңейтіп, жылқы, қой бордақылайтын, сүт өндіретін ферма салуды көздейді.
Оқи отырыңыз:
