Нұр-Сұлтан, BAQ.KZ. Қазақстандықтар суды көп іше бастады. Жылдың бірінші тоқсаны бойынша су және алкогольсіз сусындарды тұтыну 22% өсті. Бұл туралы energyprom.kz жазды.
Бір ай ішінде еліміздің қалаларында минералды және асханалық бөтелкедегі ауыз су 1,6% -ға, бір литрі 94,3 теңгеге дейін қымбаттады. Бағаның жылдық өсімі 10% болып отыр.
Шыжыған ыстықта шөл қандыру үшін атыраулықтар ыдыста сатылатын судың бір литріне 116 теңге, семейліктер 109 теңге жұмсаса, ал Петропавл тұрғындарының 104 теңге төлеуіне тура келеді.
Десе де COVID-19 пандемиясы кезеңінде минералды және газдалған су өндірісі қысқарған. Қаңтар–сәуір айларында 185 млн литр шығарылды — жылына 3,4% минус. Бұрын екі жыл қатарынан сектордағы өндіріс көлемі тұрақты өскен болатын.
Сонымен қатар, өзге де алкогольсіз сусындарды шығару керісінше 4,2%-ға, 488,9 млн литрге дейін өсті.
Жылдың бірінші тоқсанының қорытындысы бойынша, қазақстандық компаниялар алкогольсіз сусындарға деген сұранысты толығымен қамтамасыз етті. Барлық ішкі және сыртқы сатылымдардың 92%-ы жергілікті өндіріспен жабылды.
Қысқасы, қазақстандықтар суды көп тұтына бастады. Елдің ішкі нарығында су мен басқа да сусындарды тұтыну қаңтар-наурыз айларында өткен жылмен салыстырғанда бірден 22,2% -ға өскен.
