Су тасқыны басталғалы бері 100 мыңға жуық адам құтқарылды

12 Сәуір 2024, 10:19
444
Бөлісу:
Су тасқыны басталғалы бері 100 мыңға жуық адам құтқарылды
Фото: Видеодан кадр

Азаматтық қорғаныс және әскери бөлімдер комитетінің аға офицері Ерасыл Сайпаш су тасқынынан 100 мыңға жуық адам құтқарылғанын айтты, деп хабарлайды BAQ.KZ тілшісі.

Су тасқыны басталғалы бері Азаматтық қорғаныс қызметтерімен 99 869 адам, оның ішінде 36 591 бала қауіпсіз жерлерге жеткізілді. Уақытша орналастыру пунктеріне 6 586 адам, оның ішінде 3 197 бала орналасты. 9 млн текше метр еріген қар суы сорып шығарылды, 1,6 млн қапшық және 1,2 млн тонна инертті материал төселді. Авариялық-құтқару жұмыстарына 34 272 адам, 4 мың техника, 17 әуе кемесі жұмылдырылды, - деді ол. 

Осы сағатта Атырау, Ақтөбе, Ақмола, Қостанай, Шығыс Қазақстан, Солтүстік Қазақстан облыстарында 3 563 жеке тұрғын үй, 563 аула аумағы және 1 778 саяжай үйі су астында қалуда. 3 052 тұрғын үй мен 1 935 аула аумағынан су бұрылды.

Еліміздің 8 өңірінде Ақтөбе, Қостанай, Батыс Қазақстан, Ақмола, Қарағанды, Атырау, Солтүстік Қазақстан және Ұлытау облыстарында жергілікті ауқымдағы 34 ТЖ әрекет етеді. ТЖМ азаматтарды аса мұқият болуға, су тасқыны кезеңінде қауіпсіздік шараларын мүлтіксіз сақтауға, үйлерден және эвакуациялау пункттерінен тиісті рұқсатсыз шықпауға шақырады, - деді Ерасыл Сайпаш орталық коммуникациялар қызметінде өткен баспасөз мәслихатында.

Өзгелердің жаңалығы