Бүгін Ақтау қаласында Маңғыстау облысының Өңірлік коммуникациялар қызметінің базасында қазақстандық жетекші жоғары оқу орындарының көрмесі аясында баспасөз конференциясы өтті, деп хабарлайды BAQ.KZ.
БАҚ өкілдерімен кездесуге ҚР ҒЖБМ Жоғары және жоғары оқу орнынан кейінгі білім беру комитетінің төраға орынбасары Ақерке Абылайхан, ҚР Ғылым және жоғары білім министрінің кеңесшісі Руслан Емелбаев қатысты.
2022 жылдан бастап Мемлекет басшысының 2022 жылғы 11 қаңтардағы ҚР Парламенті Мәжілісінің отырысында берген тапсырмасын іске асыру шеңберінде Атырау және Маңғыстау облыстарының жастары үшін нысаналы гранттар бөлу көзделген. Бұл ретте 2022 жылы 10 мың нысаналы білім беру гранты, оның ішінде Атырау облысы үшін – 4000 грант, Маңғыстау облысы үшін – 6000 грант бөлінді.
Кездесу барысында ҚР ҒЖБМ Жоғары және жоғары оқу орнынан кейінгі білім комитетінің төраға орынбасары былтырғы жылы халық тығыз орналасқан және батыс өңірлердің жастарын еліміздің жетекші жоғары оқу орындарында оқытуға арналған нысаналы білім беру гранттары толық игерілгенін атап өтті.
2023-2024 оқу жылында 3 мың грант бөлініп, олар толық көлемде игерілді. Нақтырақ айтатын болсақ, Маңғыстау облысы бойынша 1,5 мың грант (педагогика ғылымдары – 272, жаратылыстану ғылымдары, математика және статистика – 50, ақпараттық-коммуникациялық технологиялар – 565, инженерлік, өңдеу және құрылыс салалары – 613), Атырау облысы бойынша 1,5 мың грант (педагогика ғылымдары – 283, жаратылыстану ғылымдары, математика және статистика – 49, ақпараттық-коммуникациялық технологиялар – 561, инженерлік, өңдеу және құрылыс салалары – 607) бөлінді. Ал 2024-2025 оқу жылына 3 200 грант бөлінді, - деді Ақерке Абылайхан.
ҚР Ғылым және жоғары білім министрінің кеңесшісі Руслан Емелбаев жаңа оқу жылындағы жаңашылдықтарға тоқталды.
Алдағы оқу жылына бөлінген гранттар толық игерілу үшін ведомство Атырау және Маңғыстау облыстарының әкімдіктерімен бірлесіп бірқатар шара қабылдады, оның ішінде ақпараттық-түсіндіру жұмыстары бойынша Жол карталары бекітілді. Жаңа оқу жылында дайындық бағыттарының тізбесі кеңейтілді (педагогикалық, өнер және гуманитарлық, IT, әлеуметтік, экономикалық, құқық, инженерлік және қызметтер); қысқартылған білім беру бағдарламалары бойынша колледж түлектеріне гранттар конкурсына қатысу мүмкіндігі пайда болды, - деді Руслан Тоқтарбекұлы.
Нысаналы білім беру гранттары негізінде Маңғыстау және Атырау облыстарының талапкерлері еліміздің 40-тан астам жетекші жоғары оқу орындарында білім ала алады
