СІМ басшысы III Анталия дипломатиялық форумына қатысты

2 Наурыз 2024, 06:20
352
Бөлісу:
СІМ басшысы III Анталия дипломатиялық форумына қатысты
Фото: gov.kz

Түркия Үкіметінің шақыруымен Премьер-министрдің орынбасары – Сыртқы істер министрі Мұрат Нұртілеу III Анталия дипломатиялық форумының жұмысына қатысты, деп хабарлайды BAQ.KZ ведомствоға сілтеме жасап.

Үшінші рет өтіп жатқан іс-шараға 100-ден астам мемлекет және үкімет басшылары, сыртқы істер министрлері, сондай-ақ халықаралық ұйымдардың, үкіметтік емес ұйымдардың басшылары мен сараптамалық топтардың өкілдері қатысты. Биылғы форумның басты тақырыбы: "Дүрбелең кезеңіндегі дипломатияны ілгерілету".

Ашылу салтанатында Түркия Республикасының Президенті Режеп Тайып Ердоған сөз сөйледі. Өз сөзінде ол Анталия форумы жаһандық және өңірлік күн тәртібіндегі өзекті мәселелерді талқылау үшін маңызды алаңға айналғанын атап өтті. Түркия көшбасшысы әлемдегі қазіргі күрделі геосаяси жағдайда дипломатияны жетілдіру қажеттілігіне баса назар аударды.

Форум аясында Мұрат Нұртілеу "Түркі әлемін институционализациялау: ХХІ ғасырдағы Түркі мемлекеттері ұйымы" тақырыбындағы панельдік сессияға қатысты. Аталмыш сессияның модераторы ТМҰ Бас хатшысы Кубанычбек Омуралиев болды, ал спикерлер ретінде Әзербайжан Сыртқы істер министрі Джейхун Байрамов, Қырғызстан Сыртқы істер министрі Жээнбек Кулубаев, Өзбекстан Сыртқы істер министрі Бахтиёр Саидов пен Түркия СІМ-нің бұрынғы басшысы, Парламенттің депутаты Мевлют Чавушоглу қатысты.

Министр Мұрат Нұртілеу өз сөзінде Қазақстанның түркі әлеміндегі ерекше рөлін, сондай-ақ Түркі мемлекеттері ұйымының қызметі шеңберінде интеграцияны оң дамытып келе жатқан бастамашы және Ұйымның негізін қалаушы мемлекеттердің бірі екенін атап өтті. Оған қоса ол қатысушыларды TURKTIME дәуірі ұранымен өтетін ұйымдағы қазақстандық төрағалықтың басымдықтары туралы хабардар етті.

Біздің ұйым барлық түркі елдерін біріктіреді және бірлесіп интеграциямызды нығайтудамыз. Негізгі мақсат - экономикалық және мәдени-гуманитарлық байланыстарды кеңейту. Біз бір-бірімізге әртүрлі салаларда әлеуетті ашуға көмектесеміз, соның ішінде көлік-логистика, цифрландыру және сауда салаларында, - деп мәлімдеді М.Нұртілеу. 

ҚР сыртқы саяси ведомствосының басшысы ТМҰ блоктық құрылым емес және Ұйымда жасырын күн тәртіп жоқ екенін атап өтті.

Қазақстан СІМ басшысы түркі мемлекеттерінің ынтымақтастығы өзінің өміршеңдігін көрсетіп, жаңа геосаяси шындық ретінде біртұтас Түркі әлемінің пайда болуына әкелгенін атап өтті.

Панельдік сессияға қатысушылар институттандыру үдерісінен өтіп жатқан ТМҰ дамуының оң динамикасы туралы өз пікірлерін білдіріп, түркі интеграциясын одан әрі тереңдетуде ынтымақ танытты. 2022 жылы Ыстанбұлда ТМҰ-ға мүше мемлекеттер басшыларының саммиті барысында диалог алаңынан толыққанды халықаралық ұйымға трансформациялау туралы шешім қабылданды.

Өзгелердің жаңалығы