Сенаторлар Сенаттың жалпы отырысында «Заңсыз иемделген активтерді мемлекетке қайтару туралы» заң жобасын мақұлдады, деп хабарлайды BAQ.KZ тілшісі.
Заң ел аумағында, сондай-ақ одан тыс жерлерде де заңсыз иемденілген активтерді қайтару үшін заңнамалық параметрлерді айқындау, сондай-ақ оларды заңсыз иемденуге және шығаруға ықпал еткен жағдайларды жоюды мақсат тұтқан.
Заңның міндеттері активтерді шығару саласындағы құқық бұзушылықтарды анықтау, жолын кесу, ашу және тергеп-тексеру; активтерді қайтару жөніндегі халықаралық-құқықтық ынтымақтастықты дамыту; мемлекеттік саясатты қалыптастыру және қайтарылған қаражатты қоғамның игілігі үшін тиімді пайдалану; экономикалық ресурстардың заңсыз шоғырлануына, активтерді заңсыз шығаруға ықпал еткен себептер мен жағдайларды анықтау және олардың салдарын жою, - деп атап өтті Конституциялық заңнама, сот жүйесі және құқық қорғау органдары комитетінің төрағасы Андрей Лукин.
Заң мынадай негізгі ережелерді қарастырады:
- Заңмен реттелетін құқықтық қатынастар субъектілерін анықтау;
- заңсыз иемденілген активтерді ашу, пайда болуын растау және қайтару тетіктерін регламенттеу;
- заңсыз иемденілген активтерді қайтару рәсімдерінің ашықтығын қамтамасыз ету;
- оның өкілеттіктерін айқындай отырып, заңсыз иемденілген активтерді қайтару мәселелері бойынша комиссия құру;
- заңсыз иемденілген активтерді мемлекетке ерікті түрде беруді ынталандыру;
- активтерді заңсыз иемденуге және шығаруға ықпал еткен себептер мен жағдайларды жоюға бағытталған жүйелі шаралар қабылдау;
- өз өкілеттіктерін айқындай отырып, заңсыз шығарылған активтерді қайтару мәселелері жөніндегі уәкілетті органды құру;
- өкілеттіктерін айқындай отырып активтерді қайтару жөніндегі уәкілетті органды құру;
- қайтарылған активтерді шоғырландыру және Қазақстан халқының әл-ауқатын арттыруға бағытталған әлеуметтік және экономикалық жобаларды қаржыландыру үшін арнаулы мемлекеттік қор мен басқарушы компанияны құру.
Заңда активтерді қайтарудың ерікті немесе мәжбүрлі тәртібі көзделген.
Ерікті қайтару адамдардың өздеріне тиесілі мүлікті мемлекетке ерікті түрде қайтару туралы келісімдер жасасу арқылы (яғни арнаулы мемлекеттік қорға) өтеусіз беруі жолымен жүзеге асырылады.
Соттардың шешімдері негізінде активтер пайда болуы түсініксіз шыққан активтер ретінде танылған жағдайда (жиынтық мөлшері айлық есептік көрсеткіштің он үш миллион еселенген мөлшеріне тең немесе одан асатын), азаматтық процесс шеңберінде заңсыз иемденілген активтерді мәжбүрлі түрде қайтару.
Заңды мақұлдаудан күтілетін нәтижелер: қоғамдағы әлеуметтік әділеттілікті қалпына келтіру; заңсыз иемденілген және шығарылған активтерді мемлекетке қайтару арқылы Қазақстан халқының әл-ауқатын арттыру; активтерді ерікті түрде қайтаруды ынталандыру; активтерді заңсыз сатып алуға ықпал еткен себептер мен жағдайларды жою.
