Нұр-Сұлтан, BAQ.KZ тілшісі. Сенатта «Қауіпті өндірістік объектілерде өнеркәсіптік қауіпсіздікті қамтамасыз ету: талдау, болжамдар және ұсыныстар» тақырыбына арналған Үкімет сағатында Парламент Сенаты төрағасының орынбасары Асқар Шәкіров өндірістегі жазатайым оқиғалардың негізгі себептерін атады.
Өнеркәсіптік қауіпсіздіктің даму деңгейі арқылы мемлекеттің технологиялық әлеуетін бағалауға болады. Өнеркәсіптік авариялар экологиялық, материалдық шығындарға, адам өліміне, кейде бүкіл саланың тоқырауына әкеледі. Өнеркәсіптік қауіпсіздіктің жай-күйі кәсіпорынның немесе өнеркәсіп саласының табысты дамуының индикаторы ғана емес. Сонымен қатар адамдардың өмір сүру сапасы, қоршаған орта, мемлекеттің технологиялық және инвестициялық мәртебесі өнеркәсіптік қауіпсіздік жүйесіне тікелей байланысты, - деді сенатор.
Оның сөзінше, өнеркәсіптік қауіпсіздіктің деңгейі адамның, қоғам мен мемлекеттің өмірлік маңызды мүдделерін қорғай алса ғана ол мемлекетті шын мәнінде өнеркәсіптік дамыған ел деп атай аламыз.
Өнеркәсіптік өндіріс, бір жағынан, мемлекеттің экономикалық дамуын қамтамасыз етеді, ал екінші жағынан, ықтимал қауіптің көзі болатынын атап өткім келеді. Өнеркәсіптік қауіпсіздіктің басты міндеттерінің – бірі техногендік авариялар мен апаттардың алдын алу. Бүгінгі таңда 9 мыңнан астам өнеркәсіптік кәсіпорын, оның ішінде 235 мыңға жуық қауіпті өндірістік объектілер мемлекеттік қадағалауға алынған. Соңғы бес жылда қадағаланатын субъектілер аздап өскен кезде жазатайым оқиғалардың саны 30 пайызға өсті. Жағдайды талдау өндірістегі техногендік апаттардың қаупі әлі де жоғары деңгейде сақталып, өсу үрдісінде екенін көрсетті, - деп атап өтті Асқар Шәкіров.
Сенатор атап өткендей, жазатайым оқиғалар мен оқыс оқиғалардың көбеюінің себептерін түсіну қажет, мұны тек қадағаланатын объектілер санының көбеюімен түсіндіруге болмайды.
Көбінесе жазатайым оқиғалардың негізгі себептері: өнеркәсіптік қауіпсіздік талаптарының бұзылуы, жұмыс істейтін жабдықтың жоғары тозуы, уақытында жаңартпау, өндірістік және еңбек тәртібінің төмендігі. Апаттардың қауіпсіздік ережелерін білмеуден бола бермейтінін атап өту керек. Басқаша айтқанда, ережелерді білу оларды елемеуге кепілдік бермейді. Сонымен қатар өндірістегі қауіпсіздікті тек жазалау шараларымен қамтамасыз ету мүмкін емес. Өндірістегі қауіпсіздіктің жоғары мәдениетін қалыптастыру, қолдау және дамыту қажет. Ол өндірістік және экономикалық мақсаттардан басымдыққа айналуы және барлық қызметтің жалпыға бірдей мойындалған және құрамдас бөлігі болуы керек, - деп толықтырды Парламент Сенаты төрағасының орынбасары.
Шәкіров атап өткендей, апатты жоюдан гөрі оның алдын алу әлдеқайда оңай. Өкінішке қарай, соңғы кездері ескертуге емес, құтқаруға баса назар аударылғанын айтты.
Осыған байланысты өнеркәсіптік кәсіпорындарды қауіпті өндірістік объектілерді уақтылы жаңартуға және жаңғыртуға, өндірістік бақылау қызметтерінің қызметін дамытуға және кеңейтуге, сондай-ақ ерікті өнеркәсіптік қауіпсіздікті құруға ынталандыратын, оның ішінде заңнамалық сипаттағы ұсыныстарды әзірлеу ұсынылады, - деді ол Сенатта.
