Қызылордада көкпардан ел чемпионаты өтіп жатыр

23 Сәуір 2024, 19:14
339
Бөлісу:
Қызылордада көкпардан ел чемпионаты өтіп жатыр
Фото: Ұлттық спорт қауымдастығы

Қызылордада көкпардан ересектер арасында Қазақстан Республикасының XXIII чемпионаты басталды. Оған еліміздің 15 өңірінен 300-ге жуық спортшы қатысуда, деп хабарлайды BAQ.KZ.

Көкпарға Абай, Ақмола, Атырау, Жамбыл, Қарағанды, Қызылорда, Қостанай, Маңғыстау, Солтүстік Қазақстан, Түркістан, Ұлытау, Жетісу облыстарының, Астана және Шымкент қалаларының құрама командалары, сондай-ақ Орталық армия спорт клубының командасы қатысады.

Қызылордада көкпардан ел чемпионаты өтіп жатыр
Ұлттық спорт қауымдастығы

Бүгін келесі командалар арасында топтық жарыстар өтті: Ұлытау облысы – Армия спорт клубы, Қостанай облысы – Атырау облысы, Астана қаласы – Қарағанды облысы, Алматы облысы – Маңғыстау облысы, Түркістан облысы – СҚО, Ақмола облысы – Шымкент қаласы, Абай облысы – Жамбыл облысы, Жетісу облысы – Қызылорда облысы.

Бұрын өзі де көкпар тартып, ал 2011 жылдан бастап команда жетекшісі болып жүрген Қостанай облысы құрама командасының жаттықтырушысы Ырыскелді Байтасов спортшылардың дайындығына тоқталды.

Жарысқа дейін біз Қызылорда облысында дайындық жұмыстарын жүргіздік. Спортшылар да, аттар да толық дайындалған. Жақсы өнер көрсетіп, жүлделі орынға ие боламыз деп үміттенеміз, - деді ол.

Қызылордада көкпардан ел чемпионаты өтіп жатыр
Ұлттық спорт қауымдастығы

Өз кезегінде Қостанай облысынан келген көкпаршысы Наурызбай Қалтаев ойын барысы туралы өз әсерімен бөлісті.

Ойын жақсы өтті. Барлық қарсылас командалар лайықты, жақсы дайындалған. Әр ойын қызықты әрі ерекше өтіп жатыр, - деді спортшы.

Алда – жарыстың келесі кезеңдері. Көкпардан Қазақстан Республикасы чемпионатының финалы 29 сәуірде өтеді.

Еске сала кетейік, Республикалық көкпар федерациясы Қазақстан Республикасы Ұлттық спорт қауымдастығының құрамына кіреді. Қауымдастық құрамында бұдан өзге бәйге, аударыспақ, теңге ілу, садақ ату, жамбы ату, құсбегілік, асық ату, «JORYQ» ат спорты және т.б. федерациялар бар. ҚР Ұлттық спорт қауымдастығын белгілі кәсіпкер, меценат, «Altyn Qyran Foundation» Қоғамдық қоры Қамқоршылық кеңесінің төрағасы Исламбек Салжанов басқарады.

Өзгелердің жаңалығы