Нұр-Сұлтан, BAQ.KZ. Ғарышкерлер күні қарсаңында Қазақстанның тұңғыш ұшқыш-ғарышкері, Кеңес Одағының Батыры, Халық қаһарманы, авиация генерал-майоры Тоқтар Әубәкіров «Жас сарбаз» республикалық әскери-патриоттық қозғалысының тәрбиеленушілерімен кездесті, деп хабарлады Қорғаныс министрлігінің баспасөз қызметі.
Ұлттық әскери-патриоттық орталығында өткен шараға Әуе қорғанысы күштерінің бас қолбасшысы авиация генерал-лейтенанты Нұрлан Орманбетов, «Жас сарбаз» қозғалысының төрағасы Мейірбек Меңдіғалиев, елорданың жастар саясаты мәселелері басқармасының басшысы Қайрат Қамбаров қатысты.
![Қазақстанның тұңғыш ғарышкері «Жас сарбаз» қозғалысының тәрбиеленушілерімен кездесті](/userfiles/images/photo_2022-04-12_11-00-54.jpg)
Тоқтар Әубәкіров жас патриоттарға өзінің ұшқыш боламын деген бала күнгі арманы, мақсатқа қол жеткізу үшін жұмсаған күш-жігері, ғарыш кемесімен ұшуы және жер орбитасында болған сәттері жөнінде әңгімелеп берді.
Тәрбиенің жақсы құралының бірі – үлгі-өнеге көрсету. Балалар ерліктің, батылдықтың және еңбектің арқасында арманға қол жеткізген адамды көрді. Бұндай өнеге олардың есінде қалып, арманына айналады, болашағына жол сілтейді. Менің ойымша, ересектердің міндеті – өскелең ұрпақпен жиі кездесу, оларға үлгі-өнеге көрсету, балаларды патриотизмге баулу, оларға дұрыс жолды таңдауға көмектесу, – деп атап өтті жастармен кездесуден кейін қазақстандық тұңғыш ғарышкер.
![Қазақстанның тұңғыш ғарышкері «Жас сарбаз» қозғалысының тәрбиеленушілерімен кездесті](/userfiles/images/photo_2022-04-12_11-00-50.jpg)
Жас патриоттар Тоқтар Әубәкіровке жылы лебіздерін білдіріп, «Жас сарбаз» қозғалысының символы өрнектелген футболка мен кепка тарту етті.