Ұлттық банк экономикаға берілген несиелерге қатысты мәліметті жариялады, деп хабарлайды BAQ.KZ.
Реттеушінің дерегіне сүйенсек, кеңейтілген түсініктегі экономикаға бағытталған кредиттер көлемі бір жыл ішінде 23,4%-ға өсіп, 2025 жылғы 1 қарашадағы жағдай бойынша 49,1 трлн теңгеге жеткен. Кредиттердің құрылымында айтарлықтай үлес бизнес секторына тиесілі: заңды тұлғалар мен дара кәсіпкерлердің өндірістік және іскерлік мақсаттарға алған қарыздары 23,0 трлн теңгені құрап, жалпы көлемнің 46,8%-ын алып отыр. Ал халыққа берілген кредиттер 26,1 трлн теңгеге жетіп, 53,2%-ды құраған.
Ұлттық банктің мәліметінше, осы жылдың қаңтар айында ғана азаматтарға берілген қарыз көлемі 22,4 трлн теңге болған.
Сондай-ақ кредиттердің басым бөлігі ұлттық валютада рәсімделгені атап өтілді. Атап айтқанда, теңгемен берілген қарыздар 43,7 трлн теңге немесе жалпы көлемнің 89,1%-ын құрайды. Ал шетел валютасындағы кредиттер 5,4 трлн теңге болып, 10,9% деңгейінде қалған. Ұлттық банктің хабарлауынша, қарыздың жалпы көлемінің 85,5%-ы банк секторының кредиттеріне тиесілі.
