31 мамыр мен 4 маусым аралығында Кастела қаласында (Хорватия) балалар командалары арасында «Dalmatinko Cup» халықаралық турнирі өтті, деп хабарлайды BAQ.KZ.
Турнирге 15 елден 200-ден астам команда қатысты. Қазақстаннан «Тұран-2013», «Ақтөбе-2013», «Астана-2012», «Ақжайық-2012» және «Оқжетпес-2012» жасөспірімдер спорт мектебі сынды бес команда қатысты.
«Dalmatinko Cup» турнирі 2016 жылдан бері жыл сайын ұйымдастырылатын балалар турнирі. Бүгінгі таңда бұл турнирге 15 мыңнан астам бала қатысты. 2019 жылдан бері «Каспий» жастар құрамасы мұндай ауқымдағы халықаралық жарысқа алғаш рет жолдама алды. Одан кейінгі жеребелерде Қазақстаннан аталмыш турнирге қатысатын отандық командалар саны арта бастады.
Турнирдің ұйымдастырушысы – Хорватияның бұрынғы футболшысы, футбол меценаты Ивица Пирич. Ұйымдастырушылар балалардың уақытын қызықты өткізуі, жаттығу жасауы үшін барлық қажетті жағдайларды жасаған.
Айта кету керек, биыл қазақстандық балалар Хорватияда өткен турнирде сәтті өнер көрсетті. Турнирдің плей-офф кезеңіне бірден төрт отандық команда шықты. Сондай-ақ Хорватиядағы турнирде қазақстандықтар алғаш рет күміс жүлдегер атанды. "Ақтөбе" балалар командасы финалға сенімді түрде шығып, Ташкенттің "Пахтакорынан" жеңіліп қалды.
Сонымен қатар жас футболшылар үшін қызықты бағдарлама дайындалды: Адриат теңізінің бойында, Сплит қаласы мен Хорватияның атақты "Хайдук" клубының стадионында экскурсиялар ұйымдастырылды.
Айта кетейік, 2022 жылы Қазақстан футбол федерациясының президенті Әділет Бәрменқұлов Хорватия футбол одағының басшысы Мариан Кустичпен кездесуі барысында «Dalmatinko Cup» турниріне барған болатын. Әділет Бәрменқұлов еліміздегі жасөспірімдер футболын дамыту үшін қазақстандық клубтардың осы турнирге қатысуының маңыздылығын ерекше атап өтті.
