Қазақстанда TikTok-тың өкілдігі ашылады

Қазақстанда TikTok-тың өкілдігі ашылады
463

Елімізде TikTok-тың өкілдігі ашылады. Бұл туралы Ақпарат және қоғамдық даму министрі Дархан Қыдырәлі әлеуметтік желідегі парақшасында жазды, деп хабарлайды BAQ.KZ.

Бүгін, сондай-ақ, TikTok компаниясының вице-президенті Тео Бэртраммен кездестім. Бэртрам мырза Google компаниясында жауапты қызмет атқарған, Ұлыбританияның екі бірдей премьер-министріне кеңесші болған тәжірибелі адам. 

TikTok Қазақстанда туризм бойынша біріккен жобаларды бастаған екен. Енді баспасөз хатшыларын оқыту, цифрлық сауаттылықты арттыру, әлеуметтік желіні тиімді қолдану жағынан ортақ тренингтер ұйымдастыру туралы айттым. Компания өкілі мұны құптады. 

Кездесуде TikTok интерфейсіне қазақ тілін енгізу және қазақша контентті бірлесе дамытуды ұсындым. Компания өкілі желіге қазақ тілін орнату жайы қарастырылып жатқанын жеткізді. 

Министрлік ақпарат, жастар, отбасы және азаматтық қоғамды дамыту бойынша уәкілетті орган болғандықтан, компаниямен креативті контенттер және заманауи сапалы материалдар жасауға мүдделі. Мәселен желіде Bala house, «Ел бірлігі» жобалары жақсы көріліп жатыр. Бұл бағыттағы жобаларды бірге жалғастырып, TikTok хаустарды ұйымдастырамыз. Себебі компания желіде білім беруге қатысты, имидждік контенттерді көбейтуді де жоспарлап отыр екен. 

Сонымен бірге Тео Бертрамды жуырда өтетін Astana Media Week апталығына шақырдым. Мәртебелі мейман шақыруымды қабыл алды және ауқымды іс-шараға қатысуға ынталы екенін айтты. 

Тағы бір жаңалық, жуырда Қазақстанда TikTok-тың офисі ашылады. Бұл Қазақстанның белгілі компаниямен тығыз байланыс орнатып, елге қажетті дүниелерді ақылдаса отырып жасауға таптырмас мүмкіндік деп ойлаймын. 

Астанада өткен Digital Bridge форумында Мемлекет басшысы Қазақстанның алдында цифрлық трансформацияның басымдықтарын жариялағаны белгілі. Аталған кездесулер Президент қойған міндеттерді сапалы орындауға мүмкіндік береді деп сенемін.

Қысқа да нұсқа. Жазылыңыз telegram - ға

Фото: дереккөз
Өзгелердің жаңалығы