Қазақстанда қияр, қызанақ, ет және жұмыртқа арзандады

Қазақстанда бір апта ішінде әлеуметтік маңызы бар бірқатар азық-түлік тауарларының бағасы төмендеді, деп хабарлайды BAQ.KZ. 

Ұлттық статистика бюросының хабарлауынша, Қазақстанда ең көп арзандағаны қияр болды. Ол 6,5%-ға арзандаған. Сондай-ақ келесі тауарлардың да бағасы төмендеді:

• қызанақ (-4,1%);

• сәбіз (-2,1%);

• сүйексіз сиыр еті мен жұмыртқа (әрқайсысы -0,6%-дан);

• сүйекті сиыр еті (-0,3%);

• балық (-0,1%).

Әлеуметтік маңызы бар азық-түлік тауарларының жалпы баға деңгейі бір апта ішінде Қызылорда мен Жезқазғанда (-0,4%-ға), Петропавл, Өскемен, Қарағанды, Түркістанда (әрқайсысында -0,2%-дан), Алматыда (-0,1%-ға) төмендеді. Ал Астана, Шымкент, Ақтөбе, Атырау, Қостанай, Павлодар, Семей және Тараз қалаларында баға бұрынғы деңгейінде сақталды, – деп атап өтті мамандар.

Олардың мәліметінше, Қазақстан бойынша қиярдың орташа бағасы келісіне 549 теңгені құрады. Ал ең арзан қияр Атырауда сатылуда - келісіне 365 теңге.

Бюро сонымен қатар бірінші санатты жұмыртқаның он данасының орташа құны 563 теңге болғанын хабарлады. Ең арзан жұмыртқа Қызылордада сатылады - он данасы 460 теңге.

Ал Қазақстанда ақталған күріштің орташа құны келісіне 533 теңгеге жетті. Күріштің ең төменгі бағасы Қызылордада тіркелді - келісіне 456 теңге.