Қазақстан мен Беларусь Сыртқы істер министрлері уағдаластық орнатты

20 Маусым 2023, 00:47
758
Бөлісу:
Қазақстан мен Беларусь Сыртқы істер министрлері уағдаластық орнатты
Фото: gov.kz

Беларусь астанасында ҚР Премьер-Министрінің орынбасары – ҚР Сыртқы істер министрі Мұрат Нұртілеу мен Беларусь сыртқы саяси ведомствосының басшысы Сергей Алейник арасында келіссөздер жүргізілді, деп хабарлайды BAQ.KZ.

Бүгін жемісті келіссөздер өтті, онда біз Қазақстан-Беларусь ынтымақтастығының жай-күйі мен түрлі салалардағы даму перспективаларын егжей-тегжейлі талқыладық. Қос елдің қарым-қатынасы достық пен өзара құрметте қарқынды дамуын жалғастыруда. Күн тәртібіндегі барлық мәселелер бойынша біз өзара түсіністік тауып, оларды әрі қарай ілгерілету жолдарын әзірледік, - деді Мұрат Нұртілеу сұхбатында.

Сергей Алейник атап өткендей, бүгінде қос тарап Қазақстанда өзін жақсы танытқан Беларусь ауыл шаруашылығы және автомобиль техникасын жеткізуді ұлғайту мүмкіндіктеріне назар аударды. Беларусь өрт сөндіру машиналарын бірлесіп өндіруге дайын екенін білдірді. Сондай-ақ тараптар екі елдің өңірлері арасында жемісті экономикалық байланыстар құруды жандандыру және парламентарийлер арасындағы белсенді байланыстарға жәрдемдесу жолдарын табуға уағдаласты. Сонымен қатар, Беларусьте қазақстандық білім күндерін өткізу жоспарлануда.

Екі елдің СІМ басшылары халықаралық қатынастар мемлекеттердің ішкі істеріне араласудан және халықаралық құқықтың негізгі қағидаттарына қайшы келетін заңсыз санкциялық қысымнан босатылуы керектігін баса айтты.

Екі ел де өзара саудадағы кедергілер мен шектеулерді алып тастауды, «төрт» бостандықты – ЕАЭО кеңістігінде тауарлардың, көрсетілетін қызметтердің, капитал мен жұмыс күшінің кедергісіз қозғалысын толық форматта қамтамасыз етуді қалайды. Біз Беларусь және Қазақстан тараптары халықаралық ұйымдар – БҰҰ, ЕҚЫҰ, ШЫҰ, АӨСШК алаңдарында тығыз өзара іс-қимыл жасап, бір-біріне қолдау көрсетуді жалғастыратынына уағдаластық, - деді Беларусь Сыртқы істер министрі.

Сергей Алейник баспана құрылысының симметриялы жобалары – Астанадағы «Беларусь орамы» және Минскідегі «Қазақстан орамы» бойынша жол картасына қол қойылғанын айтты.

Біз Қазақстанның Беларусьтің Шанхай Ынтымақтастық Ұйымына қосылу процесінде көрсеткен қолдауын жоғары бағалаймыз. Біз Қазақстанның Беларусь Республикасының БҰҰ Қауіпсіздік Кеңесіне берген өтінімінде дауыс беру процесінде көрсеткен қолдауын да бағалаймыз, - деп атап өтті С. Алейник.

Айта кетейік, Премьер-Министрдің орынбасары – Сыртқы істер министрі Мұрат Нұртілеу Минскідегі ҰҚШҰ сыртқы істер министрлерінің кеңесіне қатысады.

19-23 маусымда Минскіде ҰҚШҰ Сыртқы істер министрлері кеңесінің кезекті отырысы өткізіледі. Қазақстандық делегацияны Премьер-Министрдің орынбасары – Сыртқы істер министрі Мұрат Нұртілеу басқарады.

Өзгелердің жаңалығы