"Қазақстан халқына" қоры қандай жобаларды іске асырды?

15 Қаңтар 2024, 16:17
484
Бөлісу:
"Қазақстан халқына" қоры қандай жобаларды іске асырды?
Фото: BAQ.KZ -архив

Президент бастамасымен 2 жыл бұрын құрылған "Қазақстан халқына" қоғамдық қорының басшысы Болат Жәмішев қордың жұмысы туралы баяндады, деп хабарлайды BAQ.KZ тілшісі.

Қор өзінің қызмет ету мерзімінде Қазақстандықтардың Денсаулық сақтау, білім беру, әлеуметтік қолдау, мәдениет және спорт саласындағы негізгі проблемаларын шешуге бағытталған 67 қайырымдылық бағдарламалары мен жобаларының бастамашысы болды, оларды жалпы сомасы 177 млрд теңгеге іске асыру жоспарланған, оның ішінде 39,5 млн - қордың 2024 жылға арналған онкологиялық аурулармен күрес жөніндегі кешенді жоспарға қатысуы, - деді Болат Жәмішев ОКҚ-да өткен брифингте.

Қазіргі таңда қор донорлардың қайырымдылық жарналары есебінен 196,6 млрд теңге жинады, 2 жыл ішінде қор жалпы сомасы 90,9 млрд теңгеге қайырымдылық көмек көрсетті.

"Ұлттық әл-ауқат қоры туралы" Қазақстан Республикасы Заңының 20-бабының 5-тармағына сәйкес жыл сайын "Самұрық-Қазына" қоры таза табысының кемінде 7 пайызын "Қазақстан халқына" қоғамдық қорына аударатын болады. 2022 жылғы қаржылық есептіліктің қорытындысы бойынша "Самұрық-Қазына" ұлттық әл-ауқат қоры" АҚ "Қазақстан халқына" ҚҚ 66,6 млрд теңге көлемінде ақшалай қаражат бөлді. Қорға 20,6 млрд теңге мөлшерінде алғашқы жарна түсті, қалған сома келісімге сәйкес 2024 жылғы наурызға дейін жіберілетін болады, - дейді Жәмішев.

Оның айтуынша, бұл қаражат онкологиялық аурулармен күрес жөніндегі 2023-2027 жылдарға арналған кешенді жоспарда көзделген іс-шараларды іске асыруға және орфандық аурулары бар азаматтарды дәрілік препараттармен қамтамасыз ету жөніндегі бекітілген тәсілдерге сәйкес 2024 жылы дәрілік заттарды сатып алуға жұмсалады.
 

Өзгелердің жаңалығы