Ішкі істер министрінің орынбасары Игорь Лепеха мемлекеттік тілде үйреніп жүр. Ол баяндама жасай алатынын, алайда кейбір сұрақты түсінбей қалудан қорқатынын айтады, деп хабарлайды BAQ.KZ тілшісі.
БАҚ вице-министрге «Өткен аптада мемлекеттік тілді білмейтін шенеуніктерге қатысты көптеген сын айтылды. Осыған байланысты сіз жұмыс істеп жатырсыз ба? Мысалы, сіз басқа министрлер сияқты (ред. - мемлекеттік тілді үйрететін) репетиторлардың көмегіне жүгіндіңіз бе?» деп сұрақ қойды.
Мен қазақша үйреніп жүрмін. Қазір аздап сөйлеймін. Қызметтік құжаттарды оқи аламын. Баяндама (ред. - мемлекеттік тілде) жасай аламын, - деп жауап берді Лепеха.
Әрі қарай Игорь Лепеха жауабын орыс тілінде толықтырды.
Негізі (ред. - мемлекеттік тілде) жауап бере аламын. Қазір кейбір даулы мәселе бойынша қате жауап беруден қорқамын. Себебі, толық түсінбеуім мүмкін немесе қате жауап беруім мүмкін. Бірақ мен (ред. - мемлекеттік тілді) өзім үйреніп жүрмін. Барлық жиында, кеңесте барынша қазақ тілінде сөйлеуге тырысамын, - деді Игорь Лепеха.
