Роза Бағланова атындағы «Қазақконцерт» мемлекеттік академиялық концерттік ұйымы "Гүлдер" ансамблінің әртісі Аққанат Смағұлова Германияда өткен "TANZOLYMP" беделді халықаралық хореографиялық байқауының алтын медаліне ие болды, деп хабарлайды BAQ.KZ.
Мәдениет және ақпарат министрлігінің мәлімдеуінше, өнер додасында Аққанат Анвара Садықова қойған "Аққу" және Алмат Шамшиев қойған "Ерке бала" атты екі би нөмірін ұсынды.
800-ден астам өнерпаз бақ сынаған байқауда 34 қатысушы іріктеуден өтіп, гала-концертте өнер көрсетті. Айта кету керек, Аққанат - гала-концертте "Халық биі" номинациясы бойынша өнер көрсетуге мүмкіндік алған жалғыз өнерпаз.
"TANZOLYMP" фестиваль-байқауы жыл сайын өткізілетін беделді хореографиялық байқаулардың бірі. Байқау бағдарламасын мәдениет және өнер қайраткерлері мен кәсіби би оқытушылары бағалайды.
