Нұр-Сұлтан, BAQ.KZ тілшісі. Бұл туралы Үкімет кулуарында ҚР Премьер-министрінің орынбасары – Қаржы министрі Ерұлан Жамаубаев мәлім етті.
Министр сыртқа заңсыз әкетілген 1 млрд доллар көлеміндегі қаражатты қайтару бойынша жұмыс жүріп жатқанын айтты.
Қаржы министрлігі тарапынан Ұлттық банкпен айтылған статистикалық ақпараттың бәрін зерттеп, сараптадық. Соның нәтижесінде Қаржылық мониторинг агенттігіне 8 іс бойынша шамамен 1 млрд АҚШ долларына жуық заңбұзушылық деп тапқан, тәуекелі бар істерді берген болатынбыз. Олар қазір тергеу жұмыстарын жүргізіп жатыр. Бас прокуратураның тарапынан 20-дан астам құқықбұзушылыққа байланысты іс қозғалған болатын. Сол қозғалған істер бойынша шамамен 1 млрд АҚШ долларына болжанып отыр. Бірақ нақтылай ақпаратты, қай кездегі немесе немесе қандай субьектілер бойынша екенін құқық қорғау органдарынан алу керек, - деді Қаржы министрі Үкімет кулуарында.
Бұған дейін Ерұлан Жамаубаев Каспий құбыр консорциумындағы апаттан келген шығын 100-150 млрд теңге көлемінде екенін айтқан болатын.
