Н. Нұрмақов атындағы Қарағанды мамандандырылған мектеп-лицей-интернатында балалар пәндерді комикстер арқылы оқып жатыр, деп хабарлайды BAQ.KZ Қарағанды облысы әкімдігі баспасөз қызметіне сілтеме жасай отырып.
Сонымен қатар, оқушылардың өздері Қазақстан тарихы туралы түрлі-түсті журналдар әзірлеп жатыр. Он бірінші сынып оқушылары "Қазақ хандығы" атты алғашқы журналын жасап шығарды.
Тарихи тұлғалар туралы аниме-комикстер жасау идеясы тарих пәнінің оқытушысы Әсем Тарыбаеваға тиесілі.
– Мен орта сынып оқушылары "Наруто" анимесіне қызығушылық танытатынына назар аудардым. Жоғары сынып оқушыларына қазақ комикстерін жасауды, бірақ кейіпкерлерді аниме стилінде бейнелеуді ұсындым. Мені 11 сынып оқушылары қолдады. Өткен жылдың қараша айында біз "Қазақ хандығы" атты алғашқы журнал шығардық. Ол 20 беттен тұрады. Ілияс Есенберлиннің "Көшпенділер" романы негізге алынды, – деді Әсем Тарыбаева.
Төрт оқушы мұғалімнің идеясын жүзеге асыруда. Мөлдір Әуелхан мен Фариза Сағит сурет салады, ал Фатима Әмірзада мен Аружан Булгунаева ақпарат жинап, өңдейді.
– Біз сурет салуды өте жақсы көреміз, бірақ біз оны арнайы оқыған жоқпыз. Бірінші шығарылым толығымен қолмен боялған. Жаңа әңгімелер жасау үшін компьютерді қолданамыз, – дейді Фариза Сағит.
Мектеп оқушылары алғашқы аниме комикстерін дайындау үшін екі айға жуық уақыт жұмсаған. Ең көп уақыт тарихи материалдардың түпнұсқалығын талқылауға және тексеруге кетті.
Мектеп басшылығы комикстер шығаруда жас баспагерлерді барынша қолдайды және қажетті материалдармен қамтамасыз етеді.
Қазір екінші журнал – "Алаш зиялылары" бойынша жұмыс жүргізілуде. Бұл жолы журнал 40 бет болады. Жылына төрт комикс шығару жоспарлануда.
– Биыл қыздар мектепті бітіретіндіктен, олар қазірдің өзінде ізбасарлар дайындауда. Олардың жұмысын 10-сынып оқушылары жалғастырады. Олар батырлар туралы комикстер шығаруға қатысты. Алғашқы аниме Жидебай батыр туралы баяндайды, – дейді тарих пәнінің мұғалімі.
Бірақ ең бастысы – комикстер мектеп оқушылары арасында танымал болды. Оларды алтыншы сынып оқушылары қызығушылықпен оқиды және қарайды. Авторлар да танымал: қыздардан автограф сұрай бастады.
