Отандастарымыздың белсенді қатысуы мен қамқорлығының арқасында біз төтенше жағдайларға тиімді қарсы тұрып қана қоймай, ел дамуының жүйелі мәселелерін шеше аламыз. Бұл туралы ҚР Мемлекеттік кеңесші Ерлан Қарин мәлімдеді, деп хабарлайды BAQ.KZ.
Орталықтағы және жергілікті жердегі мемлекеттік органдар қазір су тасқынының зардаптарын жоюға, жағдайдың ушығуына жол бермеуге толықтай жұмылды. Барлық тиісті мемлекеттік органдар мен қызметтер, әкімдіктер тәулік бойы жұмыс істеп жатыр. Құтқару жұмыстарына барлығы 9 мыңнан астам адам мен 2 мыңнан астам техника жұмылдырылды. Су тасқыны басталғаннан бері зардап шеккен 11 аймақта 19 мыңнан астам адам, оның ішінде 8 мың бала құтқарылып, эвакуацияланды. Мемлекет басшысы мен Үкімет деңгейінде жедел кеңестер тұрақты түрде өткізіліп тұрады. Президент ең жақын емес, табиғи апат ең көп тараған шалғай өңірлердің біріне ұшып кетті. Қасым-Жомарт Тоқаев осындай қиын-қыстау сәттерде әрдайым оқиға орнына барып, жағдайды жеке бақылап, азаматтарға қолдау көрсетіп отырады. Бұдан басқа, қабылданып жатқан шаралар мен ағымдағы жағдай туралы халықты үздіксіз хабардар ету үшін Республикалық ақпараттық штаб құрылды. Штабтың тәулік бойы жұмысы Үкіметтің жедел штабының қызметімен үйлестіріледі және оны Президент Әкімшілігі үйлестіреді, - деп жазды Ерлан Қарин Telegram-да.
«Осының барлығында азаматтарымыздың ынтымағы мен жауапкершілігі айқын аңғарылады. Отандастарымыздың осындай белсенді қатысуы мен қамқорлығының арқасында біз төтенше жағдайларға тиімді қарсы тұрып қана қоймай, ел дамуының жүйелі мәселелерін шеше аламыз», - деді Ерлан Қарин.
ҚР Мемлекеттік хатшысы атап өткендей, диалог алаңдарының арқасында соңғы жылдары мемлекет пен қоғам көптеген өзекті мәселелерді шешудің оңтайлы жолдарын сындарлы түрде әзірлеп жатыр.
Мемлекет басшысының бастамасымен қолға алынған азаматтар және министрлер мен әкімдер арасындағы кездесулердің диалогтық форматы тиімді құралға айналды. Жаңа ережелер бойынша сайланған Парламент пен мәслихат депутаттары белсенді жұмыс істеуде, оларға қойылатын талап деңгейі айтарлықтай артты. Атап айтқанда, су тасқынының алғашқы күндерінен бастап Парламент депутаттары мен Ұлттық Құрылтайдың депутаттары азаматтармен тұрақты байланыста болып, зардап шеккен аймақтарды аралап, сол жерлерде кездесулер өткізіп, облыстық штабтардың жұмысына атсалысты. Мұндай бірлескен әрекеттер нәтиже береді. Барлық диалог алаңдарының, сондай-ақ депутаттар мен қоғам белсенділерінің әлеуеті алдағы уақытта инфрақұрылымды қалпына келтіруге және зардап шеккендерге көмек көрсетуге жұмсалатын қаражаттың тиімді жұмсалуын бақылауға тартылады. Бірлік пен ынтымақ құндылықтары – мәдениетіміз бен діліміздің өзегі. Осы құндылықтарды ұстану арқылы біз кез келген қиындықты жеңіп, елді жаңғырту жолында бірлесе жұмыс жасай аламыз, – деп түйіндеді сөзін Ерлан Қарин.
