Отбасы күніне орай мешітте мерекелік шара өтті

13 Қыркүйек 2020, 19:50
1824
Бөлісу:
Отбасы күніне орай мешітте мерекелік шара өтті

Нұр-Сұлтан, BAQ.KZ. 2013 жылдан бастап қыркүйек айының әр екінші жексенбісі сайын еліміз бойынша Отбасы күні мерекеленіп келе жатқаны белгілі. Осы айтулы күнге орай Қазақстан мұсылмандары діни басқармасы да «Отбасы апталығын» жариялаған болатын.

Діни басқарманың барлық өкілдіктері осы бастама аясында Отбасы күніне орай түрлі танымдық іс-шаралар ұйымдастырып, отбасы құндылықтарын насихаттау жұмысын жандандыра түсті.

Осы бастама аясында бүгін республикалық «Әзірет Сұлтан» мешітінің жалпы ұжымына Отбасы күніне орай мерекелік шара өтті. Мерекелік жиынға құлшылық ордасының барлық жұмысшылары: діни қызметкерлер мен сайт ұжымы, күзет сақшылары мен тазалықшы қауымы, техникалық бөлім мамандары қатысып, Отбасы күніне орайластырған берекелі отырыс өткізді. Бүгінгі күннің мән-маңызына тоқталған бас имам Ерболат Жүсіпов құттықтау лебізін білдіріп, отбасылық құндылықтарға қатысты әсерлі насихат айтты.

Жиын соңында жамағатпен дұға жасалып, еліміз бен жеріміздің тыныштығы, отбасы бүтіндігі мен бірлігін тілеп бата қайырды. Сондай-ақ, мешіт қызметкерлеріне мереке құрметіне орай арнайы сыйлық сөмкелері үлестірілді.

Айта кетейік, Отбасы апталығы аясында «Әзірет Сұлтан» мешітінде бұған дейін «Жанұя жарасымы» атты семинар-тренинг өткен болатын. Семинар сабағына  «Әзірет Сұлтан» мешітінде соңғы бір жыл ішінде неке қидырған жас отбасылар шақырылып, отбасы бақытына қол жеткізу жолдары жайлы насихатқа қанығып қайтқан еді.

Өзгелердің жаңалығы