Нұр-Сұлтан, BAQ.KZ. ҚР Білім және ғылым министрлігі орта білім беру ұйымдарында 2021 - 2022 оқу жылының басталуы, ұзақтығы және каникулы кезеңдерін бекіту туралы бұйрық жобасын талқылауға ұсынды, деп хабарлайды zakon.kz.
Бұйрық жобасына сәйкес, 2021 - 2022 оқу жылының басталуы 2021 жылғы 1 қыркүйек деп бекітілген.
Оқу жылының ұзақтығы 1-сыныптарда – 33 оқу аптасы, 2-11 (12) - сыныптарда – 34 оқу аптасы.
Мейрам күндеріне түскен сабақтар оқу бағдарламасы мазмұнының кіріктірілуі ескеріле отырып, қайталауға арналған сағаттар есебінен келесі жұмыс күндеріне ауыстырылады.
Келесі жылғы оқу жылы ішіндегі каникул кезеңдерін келесідей бөлу ұсынылады:1-11 (12) – сыныптарда:
күзгі каникул – 8 күн: 2021 жылғы 25 қазан мен 1 қараша аралығында (өткен жылы 10 күнді құраған);
қысқы – 11 күн: 2021 жылғы 31 желтоқсан мен 2022 жылғы 10 қаңтар аралығында;
көктемгі – 11 күн: 2022 жылғы 21-31 наурыз аралығында (өткен жылы 12 күнді құраған);
1-сыныптар үшін қосымша каникул 7 күн (2022 жылғы 7-13 ақпан аралығында) болады делінеді.
