Нұр-Сұлтан, BAQ.KZ. Елордалық Триатлон паркте Халықаралық Олимпиада күніне орай спорттық жарыстар мен ойындар өтті.
Қазақстан Ұлттық Олимпиадалық комитеті олимпиадалық құндылықтарға маусым айынын тұтастай арнады. Бұл ай халықаралық және Қазақстан олимпиадалық қозғалысының «Біз біргеміз! Тезірек, биігірек, мықтырақ – бірге» ұраны бойынша өткізілуде, деп хабарлайды қала әкімдігінің ресми сайты.
Нұр-Сұлтан Триатлон паркінде халықаралық Олимпиада күніне орай урбан-спорт фестивалі өтті. Оның бағдарламасында 3х3 баскетбол, стритбол, стрит-воркаутерлер мен каноэшілер және текбол бәсекесі болды. Бұл салыстырмалы түрде спорттың жаңа түрі, футбол мен үстел теннисінің гибриді саналады. Текболды ойлап шығарған команда жаңа спорт түрін олимпада бағдарламасына енгізуге тырысуда. Одан бөлек, елорданың ең жас тұрғындарына арнап Токио-2020 Олимпиадасының жолдамасын ұтып алған ұлттық құрама мүшелері Кирилл Герасименко мен Анастасия Лаврова шеберлік сабағын өткізді.
Айта кетейік, биыл елордада 700-ге жуық спорттық және дене шынықтыру іс-шарасы өткізіледі. Қалада 30 мың орынға арналған «Астана Арена» стадионынан бастап шағын көше алаңдарына дейінгі 800-ге жуық спорт нысаны бар. Қосымша спортпен айналысу қадамдық қашықта қолжетімді.
Қазақстан келесі жылы Олимпиада қозғалысына қатысқанына 30 жыл толғанын атап өтеді. Тәуелсіздік жылдарында спортшыларымыз 6 жазғы және 7 қысқы Олимпиада ойындарында өнер көрсетіп, 77 олимпиадалық медаль, оның ішінде 16 алтын медаль жеңіп алды.
Баршаңызды халықаралық Олимпиада күнімен құттықтаймын! Бұл қозғалысқа көптеген елдердің қатысатыны жақсы. Олимпиадалық көңіл-күй бүкіл жаз бойы сезіліп тұрса екен деймін, себебі, спортшылар Токиға аттанып барады. Біз, яғни олимпиадашылар, барша қазақстандықтарды спортшыларды қолдауға шақырамыз. Олимпиадада сіздердің қолдауларыңыз бізге аса қажет, - деді Рио Олимпиадасының жүлдегері Василий Левит.
