Бас жаңалықтар
Ошақбаев: Түркістан полициясы 422 мың теңгеге кресло сатып алмақ
07 Ақпан 2019, 11:53 909

Ошақбаев: Түркістан полициясы 422 мың теңгеге кресло сатып алмақ

Астана, BAQ.KZ тілшісі.  Түркістан қаласы ішкі істер басқармасы  мемлекеттік сатып алу жүйесі арқылы массаж жасайтын креслоны 422 мың теңгеге сатып алғысы келеді.


Бұл туралы ҚР Мемлекеттік қызмет істері және сыбайлас жемқорлыққа қарсы іс-қимыл агенттігі жанындағы мониторинг тобының мүшесі Рахим Ошақбаев мәлім етті.

«Біздің ойымызша, мемлекеттік сатып алу жүйесінің 30% тиісті бәсекеге қабілетті орта арқылы жүргізілген. Алайда онда мемлекеттік қызметкерге қажет емес тауарларды сатып алу деректері кездеседі. Қазіргі таңда Түркістан қаласының ішкі істер басқармасы (қазіргі полиция департаменті – автор) мемлекеттік сатып алу жүйесі арқылы массаж жасайтын креслоны 422 мың теңгеге сатып алғысы келеді. Қалалық ішкі істер басқармасына (қазіргі полиция департаменті – автор) мұндай соммаға кресло не үшін қажет? Біз мұны түсіне алар емеспіз», - деді сарапшы Мемлекеттік қызмет істері және сыбайлас жемқорлыққа қарсы іс-қимыл агенттігінің 2018 жылды қорытындылауға арналған отырысында.

Осы орайда Рахим Ошақбаев мониторинг жүйесі мемлекеттік сатып алу жүйесі арқылы орынсыз сатып алуды алдын алуға мүмкіндік беретінін атап өтті.
Дәурен ЕРБОЛАТ

Сізден жаңалық