Нұр-Сұлтан, BAQ.KZ тілшісі. Нұр-Сұлтан әкімдігі нөсер канализациясының құрылысы мен тазалығына ерекше көңіл бөледі. Қазір қалада 3 ірі нөсер канализациясының құрылысы мен тазарту құрылысы жүргізілуде. Бұл туралы елорда әкімі Алтай Көлгінов тұрғындармен есептік кездесуінде айтты.
Құрылыстың қарқынын ескере отырып, сонымен қатар нөсер канализациясының жүйесімен де уақтылы айналысып отыру қажет. Қаладағы проблемалы орындардың бірі - Б.Момышұлы учаскесі. Онда нөсер канализациясының магистральді коллекторының құрылысын аяқтаймыз. Аталған нөсер канализациясының ұзындығы 500 метрді құрайды – басы Дауылпаз көшесінен Елім-ай көшесіне дейін. Бұл қолданыстағы нөсер канализациясы желісінің өткізу қуатын бір жарым есеге арттыруға мүмкіндік береді, - деді Көлгінов.
Сондай-ақ әкім «Жастар» ықшам ауданындағы коллекторларға реконструкция жасап, тазарту жұмыстарын жүргізетінін айтты.
Бұрын бұл жер батпақты болған. Мұндағы тазарту қондырғысы жауын-шашын суын Есіл өзеніне тазартып құюға мүмкіндік береді. Бұған дейін қалдық су өзенге сол күйі құйылып, ағынды суды лайлап, қала экологиясына да кері әсерін тигізген. Биыл құрылысты аяқтауды жоспарлап отырмыз. Алайда суды тазалаудың бірінші кезеңін өткен жылдың күзінде іске қосқан болатынбыз, - деді елорда әкімі Алтай Көлгінов.
Ол атағандай, «Жастар» ықшам ауданындағы жаңа тазарту қондырғысы қуаты тәулігіне 42 мың текше метрден асады.
Бұл тазарту қондырғысы Тәшенов, Бараев, Уәлиханов, Иманбаев көшелері мен Республика даңғылын су басудан қорғауға мүмкіндік береді. Бұл тазарту қондырғысы жерасты болғандықтан, оның үстіңгі жағында абаттандырылған гүл бағын орналастыру, көгалдандыру қарастырылған. «Тельман» тұрғын алабындағы магистральді коллектор мен тазарту қондырғысы жұмыстары аяқталды. Оның қуаты тәулігіне 36 мың текше метрді құрайды. Бұл жобаны жүзеге асыру «Тельман» тұрғын үй алабы мен № 27 көше бойындағы және басқа да құрылысы қарқынды жүріп жатқан аумақты су басудан қорғауға мүмкіндік береді, - деді ол.
Бұдан бөлек Көлгінов 2020 жылы тазарту құрылыстары «Пригородный» тұрғын алабы мен Алаш тас жолының бойындағы логистикалық ауданында да жүргізілгенін айтты.
2019 жылы «Мыңжылдық» аллеясы аумағындағы екі учаскеде нөсер канализациясының мәселесі шешілді. Нөсер канализациясының жүйесі тоқтаусыз жұмыс істеуі үшін коллекторларды үнемі тазарту жұмыстары да жүргізілуде. Тәшенов көшесінің бойынан 30 тонна, арықтар мен құдықтан 2,5 мың тонна қоқыс шығарылды. Бұдан бөлек нөсер канализацияларына заңсыз қоқыс тастауды тексеру бойынша рейдтер де жүргізіліп тұрады, - деді ол.Айта кетейік, есептік кездесуде Нұр-Сұлтанда газ тарту бағасы 30%-ға арзандағаны хабарланды.
